Qazan aıynda ótkizilmegen «The Most Credible Award 2018» ataýy «Silk Road Cohesion Awards 2018» dep ózgertilgen kınofestıval Shanhaıda ótetin bolady dep jazady Qamshy.kz aqparat agenttigi. Bul týraly Almaty qalasynda ótken pres-konferensıa kezinde akter Muhammed-Rasýl Kózdibaı habarlady.
15-16 jeltoqsanda Shanhaıda halyqaralyq «Silk Road Cohesion Awards 2018» atty ótedi. Atalmysh kınofestıvalǵa ár taraptaǵy elderden qonaqtar keledi. Qýantarlyǵy, kınofestıvalde otandyq týyndylar kórermen nazaryna usynylady.
Muhammed-Rasýl Kózdibaıdyń aıtýynsha, bul kınofestıval qytaılyq seriktesterdiń ótinishi boıynsha qazan aıynan jeltoqsan aıyna ózgertilgen.
«Silk Road Cohesion Awards 2018» kınofestıvalinde qazaqstandyq 10 fılmmen qatar Reseıdiń kınokartınalary da kórermenge jol tartady.
«Kórermenge usynylatyn fılmderdiń qatarynda Aqan Sataevtyń «Anaǵa aparar joly», Nurtas Adambaıdyń «Lıfti», Meıirhan Shernıazovtyń «Regıstratory» bar. Basqa da týyndylardy qytaılyq uıymdastyrý komıtetimen keńesý arqyly tańdap, taldaıtyn bolaymyz. Birneshe fılmder qytaılyq kınoprokatqa shyǵý múmkin. Biz tańdaǵan jáne bizge usynǵan fılmderdiń arasynan fılmdi tańdaǵan bolatynbyz. Ázirge 3 qazaqstandyq fılm qytaılyqtarǵa unady. Biraq tańdaý áli jalǵasýda. Al tolyq tizim jeltoqsan aıynyń basynda jarıalanady. Biz tizimge engen qazaqstandyq týyndylardyń sany kóp bolady dep senemiz. Keıin kınofestıvalde otandyq prodússerler, rejıserler, akterler marapattalatyn bolady. Biz Qytaıǵa elimizdiń básekege qabiletti mádenıetin, kınoındýstrıasyn kórsetkimiz keledi» deıdi Muhammed-Rasýl.
Kınofestıvalge Ip Man retinde kórermen esinde qalǵan Donnı Ian sekildi Qytaıdyń tanymal akterleri, tanymal rejıserlermen qatar álemdik juldyzdar qatysady. Sonymen birge qurmetti qonaqtardyń qatarynda álemdik juldyzǵa aınalǵan Dımash Qudaıbergen de bolýy múmkin. Alaıda ázirge belgisiz. Qazaqstannyń basqa da juldyzdary atalmysh sharaǵa qatysady.
«Sharaǵa qazaqstandyq akterlerdiń qatarynda Sanjar Madıev, Maıirhan Shernıazov, Azız Beıshenalıev, rejıserler Aqan Sataev, Asqar Bısembın qatysady. Sonymen birge Almaty ákimi men Mádenıet jáne sport mınıstri Arystanbek Muhamedıulyn da sharanyń qurmetti qonaǵy bolýǵa shaqyrǵymyz keledi. Al biz uıymdastyrýshylar retinde 14 jeltoqsanda saparǵa shyǵamyz. KOZ Production «Jańa Jibek joly – bir belbeý, bir jol» baǵdarlamasy aıasyn damytý jumystaryn júrgizip jatyrmyz. Bizdiń kompanıa Qytaımen kelisimshartqa qol qoıǵan Qazaqstandaǵy jalǵyz kompanıa bolyp tabylady» deıdi Muhammed-Rasýl Kózdibaı.
