Qazaq tildi ınternet keńistigi sońǵy jyldary jańa serpinmen damyp kele jatyr. Mundaǵy oıyn-saýyqtyq ári «tanys-bilistik» jeńil-jelpi kontenttiń ornyn salmaqty tanymdyq materıaldar men sapaly sýret-vıdeolardyń qarasy basýda.
2014 jyly ótken «Blogıada» baıqaýy qalam-fotoapparat ustaǵan talaı jastyń blogerlikpen shyndap kirisýine muryndyq boldy desek, artyq aıtqandyq emes. Sondaı-aq, naýryzdyń 26-synda bastalǵan «Qazaqıa-2015» baıqaýy da Qaznetke jańa lep ákelip otyr. Aldyn ala eki týr arqyly iriktelip alynǵan úmitkerler toby ulan-ǵaıyr qazaq dalasyn jalǵap jatqan shoıyn jol beketterin basyp ótip, kórgen-túıgenderin oqyrmanmen bólisip otyrdy. Qalyń qazaq kók jáshikten kóre bermeıtin, qaǵaz gazetten oqı bermeıtin aqparatty ǵalamtor arqyly lezde bólisip otyratyn mundaı mobıldi joba buryn-sońdy bolmaǵan.
Bir aýmaqtan bir mezette san túrli kózqaras pen san túrli aqparattyń oqyrmanǵa berilip otyrýy – qazaq blogerleriniń qarym-qabiletin jańa deńgeıge kóterip tastady. Osy turǵyda, eger «Qazaqıa-2015» jobasy aldaǵy jyldary da jalǵasyn tabar bolsa, jastar arasynda ashyq báseke men teńdessiz tájirıbege úndeıtin táýelsiz jýrnalısik mektepke aınalýy múmkin. Bıylǵy jylǵy baıqaýdyń basty lozýngisi – «Elińdi tany» eken.
Iaǵnı, blogerler joryǵy túrli aımaqtyń ekonomıkasy, mádenıeti, áleýmettik jaǵdaıy, sondaı-aq dástúrli tanymy jaıly sapaly materıaldar jazyp, qazylardyń baǵalaýyna tapsyrady. Atap óterligi, saıysta synǵa túsetin materıaldardyń negizgi jarıalanym alańy – áleýmettik jeliler. Onyń ishinde Feısbýk arqyly kópshilikke usynylǵan foto-vıdeo jáne mátindik materıaldardyń kórilim sany, unatý batyrmasynyń, sondaı-aq bólisý sanynyń jıyntyǵy eskerile otyryp, qazylardyń sheshimimen jeńimpaz anyqtalady. Jobanyń júlde qory – 1 000 000 teńge.
«Qazaqıa-2015» blog-saparynyń sońǵy núktesi – Astana qalasy bolmaq. Úmitkerler arasyndaǵy báseke márege jaqyndaǵan saıyn qyza túsip, oqyrman arasynda túrli talqylaýlar júrýde. «Altel» kompanıasy qoldaý bildirgen saıystyń jeńimpazdarynyń esimi 22 sáýirde belgili bolady.
