Qytaıdaǵy qazaq ǵalymy, Úrimji aýrýhanasynyń aǵa dárigeri Jasarat Jálelulynyń medısına salasyna engizgen jańalyǵy talaıdy tań qaldyrdy. Onyń emdeý tásiliniń artyqshylyǵyn Qytaı jáne AQSH mamandary moıyndap otyr.
Jasarat Jáleluly medısınaǵa kıiz úı úlgisindegi tigis túrin engizip, bul eńbegin aldymen Qytaıda, odan keıin AQSH-ta patenttegen. Adam emdeýde bes myń jyldyq tarıhy bar Qytaı elinde tosyn jańalyq ashqan dárigerdiń atalǵan tásili ulttyq ereksheligimen de qundy. Ǵalymnyń kıiz úı formasyndaǵy tigisiniń kóptegen artyqshylyǵy bar kórinedi. Sonyń biri retinde adamnyń synǵan súıegine ota jasap, ony álgi ádispen tikkennen keıin gıpspen qatyrýdyń qajeti joq ekenin aıtýǵa bolady. J.Jáleluly bul em túrine «kıiz úı úlgisindegi ota jasaý ádisi» dep at qoıypty. Qazaq ǵalymynyń kádimgi qazaqy etikke baılanysty taǵy bir sony jańalyǵy bar. Atap aıtqanda, ol adamdarda, ásirese, sportshylarda jıi kezdesetin ókshe tirseginiń úzilýin pyshaq tıgizbeı, kádimgi qazaqy etikpen emdeýdi qolǵa alǵan. Munda naýqas em alý kezinde tósekke tańylyp jatpaıdy. Kerisinshe, álgi etikti kıip alyp, úsh mezgil bıleıdi. Mamannyń bul sońǵy jańalyǵyn ázirge Qytaı jaǵy patenttep beripti. Dáriger aldaǵy ýaqytta osy ǵylymı jobasyn Eýropaǵa tanystyrýdy josparlap otyr. Aıta keteıik, Jasarat 1985-1990 jyldar aralyǵynda Shyńjań medısına ınstıtýtynda bilim alǵan. Keıin medısına ýnıversıtetinde uzaq jyl qyzmet jasap, medısına ǵylymynyń doktory dárejesine deıin kóterildi. Qazir Shyńjań avtonomıasynyń súıek aýrýlaryn zertteý ortalyǵynda qozǵalys medısınasyn zertteý bóliminiń meńgerýshisi mindetin atqarady. Sonymen birge Shyńjań dástúrli qazaq medısınasy qoǵamynyń alqasy.Jasarat Jáleluly óz ónerin ushtaı túsý úshin Beıjiń qozǵalys medısınasyn zertteý ortalyǵy Shanhaı Hýashan emhanasynyń súıek bólimi, Shanhaı ýnıversıteti bıodınamıkalyq zertteý oryny, Shanhaı Fýdan ýnıversıteti bıomedısına zertteý oryny, Gýańjoý Juńshan ýnıversıteti molekýlalyq bıologıany zertteý oryny syndy ǵylymı-zertteý ortalyqtarynan tájirıbeden ótken bilikti ǵalym. Ol 2009 jyly Shyńjań medısına ýnıversıtetiniń tańdaýly ǵylymı qyzmetkeri bolyp baǵalandy; 2010 jyly Juńhýa medısına qoǵamynyń 12 kezekti súıek aýrýlary ǵylymı talqy májilisinde jáne 5 kezekti halyqaralyq COA ǵylymı talqy jınalysynda arnaıy marapatqa ıe bolǵan.
BAQ.KZ
