"Tehnıkalyq aqaýy bar avtobýsty zańsyz paıdalanǵan" dep kúdikke ilingen 46 jastaǵy Ordýhan Mehtıev - Qazaqstan azamaty. 2018 jylǵy 18 qańtar kúni jolaýshylar avtobýsy órtenip ketken soń Mehtıev qazaqstandyq quqyq organdaryna kelmeı, tergeýden qashyp júrgen. Keıin Túrkistan oblysynyń Saryaǵash aýdandyq ishki ister basqarmasy oǵan halyqaralyq izdeý jarıalap, Qylmystyq kodekstiń "Kólik quraldaryn sapasyz jóndeý nemese olardy tehnıkalyq aqaýlarymen paıdalanýǵa shyǵarý" týraly 348-babynyń 4-tarmaǵy boıynsha aıyp taqqan. Ordýhan Mehtıev 20 qarashada Tashkenttiń Sergeli aýdanynda ustalǵan.
Qazaqstan Bas prokýratýrasy Ordýhan Mehtıevtiń 26 jeltoqsan kúni Shymkent qalasyndaǵy tergeý ızolátoryna jetkizilgenin málimdedi.
Bıyl 18 qańtarda Aqtóbe oblysynyń Yrǵyz aýdany Qalybaı aýylynan 10 kılometr qashyqta Shymkent - Samara jolynda jolaýshylar avtobýsy órtengen. Bılik oryndarynyń habarlaýynsha, avtobýsta barlyǵy 57 adam bolǵan, olardyń 52-si qazaǵa ushyraǵan. Qurban bolǵandardyń barlyǵy – Ózbekstan azamattary. Eki jolaýshy men úsh júrgizýshi aman qalǵan.
Keıin Aqtóbede qaıǵyly oqıǵaǵa baılanysty is qozǵalyp, bes adam qamalǵan. Aman qalǵan úsh júrgizýshi bıyl qarasha aıynda bes jylǵa, avtobýsty jalǵa alǵan "Azıa tranzıt servıs" kompanıasynyń quryltaıshysy men avtboýs mehanıgi úsh jarym jylǵa sottalǵan.
Sot sheshimimen sottalýshylar qaıtys bolǵan Ózbekstan azamattarynyń týystaryna 2 mln teńgeden ($5400) moraldyq ótemaqy tóleýi tıis.
