Ǵ.Músirepov atyndaǵy balalar men jasóspirimder teatryn 4 jyl boıy basqarǵan Sábıt Ábdihalyqov jańa qyzmetke taǵaıyndaldy. 2018 jyldyń 27 jeltoqsanynda Astana ýaqytymen saǵat 10.00-de Muhtar Áýezov atyndaǵy akademıalyq drama teatrynyń dırektory bolyp taǵaıyndaldy.
Bul týraly Qamshy.kz aqparat agenttigine Áýezov atyndaǵy akademıalyq drama teatrynyń baspasóz hatshysy rastady.
Sábıt Ábdihalyqov 1992 jyly Qazaq memlekettik teatr jáne kıno ınstıtýtyna “Drama jáne kınoakter” mamandyǵyna túsip, kásibı deńgeıdegi akter mamandyǵyn ıgergen.
Kishkentaıynan “Tamashany” kórip ósken ol oqý bitirgen soń “Baýyrjan shoýǵa” barady. “Tamashada” da, “Baýyrjan shoýda” da óner kórsetip, keıin 2003 jyly Janatbek Báıtekov ekeýi “Mafıa men Taqıa” teatryn ashty.
Kópshilik akter retinde ǵana tanıtyn Sábıt Ábdihalyqov 25-ke jýyq sahnalyq qoıylym – satıralardyń avtory.
Kıno salasyndaǵy bilimin Amerıkaǵa baryp jetildirip kelgen akter “Qantalapaı”, “Lúbov v kredıt”, “Bizdiń aýyl Voo” sıaqty kınolardy túsirgen.
Ǵ.Músirepov atyndaǵy balalar men jasóspirimder teatrynyń resmı paraqshasy akterdiń eńbek jolyna qysqasha toqtalyp ótti.
"Sábıt Ábdimútáliulynyń tikeleı qoldaýymen teatr ártisteriniń izdenisine, shyǵarmashylyqtaryna erkindik berilip, sonyń nátıjesinde – E.Amanshaevtyń «Úzilgen besik jyry» shyǵarmasynyń jelisi boıynsha sahnalanǵan «Ol» monospektakli (rej. E.Káribaev) sahnalandy. Bul spektákldiń ereksheligi – qoıylymnyń sahnada emes, teatr foıesinde ótýi. Monospektakl – kórermenderdiń suraýymen birneshe márte saxnalanyp, festıválderde "Úzdik" degen nomınasıalarǵa ıe boldy.
Qazirgi qazaq teatrlary arasynan alǵashqy bolyp dala teatryn jańǵyrtyp, «Bazaryń tarqamasyn» (avt.B.Esenálıev, rej.J.Jumanbaı) mýzykalyq dramasyn ashyq aspan astynda kórermen nazaryna usynyp, «EKSPO – 2017» Halyqaralyq kórmesine arnaıy Mınıstrliktiń shaqyrtýymen Astana qalasyndaǵy «Etnoaýyl» Ulttyq mádenı kesheninde Respýblıkamyzdan jáne shet memleketterden kelgen qonaqtarymyzǵa kórsetilip, dúıim jurtshylyqtyń kóńilinen shyqty.
2015 jyldan bastap, jyl saıyn dástúrli túrde Mádenıet jáne sport mınıstrliginiń, mınıstr Arystanbek Muhamedıulynyń tikeleı qoldaýy jáne qatysýymen, Almaty qalasy Óner oshaqtarynyń arasynda dostyq, yntymaqtastyq qatynasty nyǵaıtý maqsatynda ártúrli sport túrlerinen jarys uıymdastyryp keledi. N.Á.Nazarbaevtyń "Latyn álipbıine kóshý - qazaq tilin xalyqaralyq dárejege shyǵarý" saıasatyn qoldaý maqsatynda balalardyń latyn qarpin tez ári utymdy úırenýleri úshin #alǵashqy bolyp arnaıy tapsyryspen "Áripter álemine" tanymdyq ertegisin saxnalady. Jáne tek Almaty q.kórermenderi ǵana emes, ózge óńirleriniń arnaıy shaqyrtýymen birneshe qalaǵa gastróldik sapar jasady", - deı kele teatr ujymy teatr tarıxy úshin qashan da janashyr basshy bolyp oryn alatyn Sábıt Ábdimútáliulynyń aldaǵy eńbek jolyna shyǵarmashylyq tabystar tiledi.
