Shymkentte erli-zaıypty 3 jasar qyzynyń balabaqshada zorlanǵanyn aıtyp, polısıaǵa aryzdandy, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

3 jasar búldirshinniń ákesi (etıkalyq sebepterge baılanysty aty-jóni jazylǵan joq) jaǵa ustatarlyq oqıǵanyń 25 jeltoqsanda Shymkenttegi Qarataý aýdanynda ornalasqan balabaqshada bolǵanyn aıtty. 

Sol kúni qyzyn balabaqshadan úıine ákelgen anasy onyń ish kıiminen qan izin baıqaǵan. Balanyń ata-anasy birden polısıaǵa shaqyryp, aryzdanǵan. 

"Kelinshegim qyzymnyń ish kıiminen qan izin kórgende, shoshyp ketti. Qyzym oqıǵanyń qalaı bolǵanyn aıtyp jatyr. Al balabaqsha qyzmetkerleri mundaı sumdyq bolǵan joq dep, muny balanyń ózi qurastyryp otyr deıdi. 3 jasar qyz ondaı nárseni qaıdan bilsin?", — deıdi ashynǵan áke.

Onyń aıtýynsha, jantúrshigerlik oqıǵa kezinde tárbıeshi jumys ornynda bolmaǵan. Qyzdyń ata-anasy polıseılermen birge balabaqshaǵa baryp, beınebaqylaý kameralarynyń jazbasyn tekserip shyǵypty.

"Balabaqshaǵa ornatylǵan kamerada qyzymnyń tek jylap otyrǵany kórinip tur. Balabaqsha dálizindegi vıdeolardy kóre almadyq", — deıdi er adam. 

Sol túni kishkentaı qyzdy anasy dárigerge alyp baryp, sot-medısınalyq saraptamadan ótkizipti. Saraptama qorytyndysy bir aı ishinde daıyn bolady. 

Shymkent qalalyq polısıa departamentiniń baspasóz hatshysy Ásel Sádenova atalǵan is Qarataý aýdandyq polısıa basqarmasynda tirkelgenin rastady.

Qylmystyq kodekstiń 124-baby ("Jas balalardy azǵyndyq jolǵa túsirý") boıynsha sotqa deıingi tergeý bastalǵan. Tıisti saraptamalar taǵaıyndaldy.

"Qylmystyq kodekstiń 201, 147-babyna sáıkes sotqa deıingi tergeý derekteri jarıa etilmeıdi", — dedi Sádenova. 

Aıta ketsek, 3 jasar qyz erli-zaıyptynyń ortańǵy balasy eken. Budan basqa taǵy eki bala tárbıelep otyr.