Aınur Isına Álibı Jumaǵulovpen bolǵan jantúrshigerlik jaǵdaıǵa qatysty suhbat berdi.

Qaırat Jamalıev 21 sáýir kúni Astana qalasynyń turǵyny Álibı Jumaǵulovty azaptap, urǵany kópshiliktiń jaǵasyn ustatqan bolatyn. Álibıdi kásipker Jamalıev áıeli úshin urǵan bolýy múmkin degen boljamnan keıin, Qaırat Jamalıevtiń jubaıymyn dep ózin tanystyrǵan Aınur Isına suhbat berýge kelisti.

Suhbat barysynda ol 25 sáýirde Jumaǵulovty jaqsy halde óz kózimen kórgendigin aıtty.

“Álibıdiń densaýlyǵy jaqsarǵan. Ol bizdiń (Jamalıevpen turatyn) úıge eki polısıa qyzmetkerimen birge tergeý júrgizý úshin keldi. Jaǵdaıy jaqsy, ózi eshkimniń kómeginsiz kelip, taksımen keri qaıtty. Buǵan kýágerler de bar – ınternet arqyly bárin bilip alǵan kórshilerimiz”, – deıdi Isına.

Isına zardap shekken azamattyń jansaqtaý bóliminde aýyr halde jatqany shyndyqqa janaspaıdy dep esepteıdi.

“Menińshe ony kóp qan joǵaltyp, jansaqtaý bóliminde jatyr dep ásirelep jibergen. Múmkin rasymen de aýrýhanada jatqan shyǵar? Alaıda, onyń ózi júrip-tura alatynyn, bet-qulaǵy ornynda ekenin óz kózimmen kórdim. Buny men ǵana emes, kóptegen kýágerler de kórdi”, – dep sózin jalǵastyrdy áıel.

Tilshiniń “Siz Jamalıevtiń zańdy áıelisiz be?” degen saýalyna Isına “munyń iske esh qatysy joqtyǵyn” alǵa tartty.

Elder shý shyǵarǵandy unatady. Onyń jaǵdaıy jaman emes ekenin úı aınalasyndaǵy kameralar da túsirip aldy. Men kúıeýimdi bosatqanyn qalaımyn

“Men onyń (Jamalıevtiń) balasynyń anasymyn. Al zańdy áıelimin be, joq pa bunyń Álibıge esh qatysy joq… Elder shý shyǵarǵandy unatady. Onyń jaǵdaıy jaman emes ekenin úı aınalasyndaǵy kameralar da túsirip aldy. Men kúıeýimdi bosatqanyn qalaımyn”, – deıdi Isına.

Al ınternette jazylyp jatqandardyń kóbisimen Isına kelispeıtindigin jasyrmady.

“Internette (Álibıdi) ony úıde útikpen, “paıalnıkpen” urdy, úıimizde pornografıa bar degen pikirler kezip júr. Bunyń bári jalǵan. Úıimizde kishkentaı bala bar. Onyń kóz aldynda pornografıany qalaısha ustap otyramyz? Al “paıalnık” bizdiń úıde tipten joq. Men tipti “paıalnıktiń” ne ekenin de bilmeımin”, – dep mán-jaıdy túsindirdi Aınur.

“Astana arýy” Álibıdiń ne sebepti  21 sáýirde soqqyǵa alynǵanyna óz oıyn aıtty.

Álibımen aramyzda eshteńe bolǵan emes. Men tek onymen kúıeýim týraly aqpar beretinine senip qalyp, baılanysqa shyqtym. Alaıda, sóziniń dáleli bolmaǵasyn aqsha bermeı qoıdym. Sodan keıin, ol kúıeýimniń mazasyn ala bastady

“Ne sebepti bulaı bolǵanyn bilmedim. Biraq kúıeýime qaıta-qaıta qońyraý shalyp, ózi keldi. Aqsha tapqysy keldi me, kim biledi? Bul jaǵdaıǵa ózi suranyp aldy. Ol (Álibı) kúıeýim kózime shóp salyp júr dep sendirýge tyrysyp, qyr-sońymnan qalmady. Ańdyp túsirgen vıdeolaryn jiberse de sózine senbedim. Kúıeýime bolǵan jaıtty aıtyp berdim. Ekeýi restoranda shý shyǵarmaı adamsha sóılesti. Oǵan kýágerler de boldy. Al Álibımen aramyzda eshteńe bolǵan emes. Men tek onymen kúıeýim týraly aqpar beretinine senip qalyp, baılanysqa shyqtym. Alaıda, sóziniń dáleli bolmaǵasyn aqsha bermeı qoıdym. Sodan keıin, ol kúıeýimniń mazasyn ala bastady. 7 sáýirge deıin habarlasýyn qoımady. Al kóligin odan eshkim tartyp alǵan emes. Ol ózi júrgizýshige kólikti erteńge deıin ákete tusryn degen bolatyn. Álibıdiń ózgeshe sóılep shyqqanyna ózimiz de tańbyz”, – dep jalǵastyrdy Isına.

Kúıeýin ǵalamtorda balaǵattap jatqandarǵa Isına kelesi sózderin jetkizdi:

“Qaırat óte jaqsy adam. Qashanda jaǵdaıy joqtarǵa qol ushyn berip júredi. Ol jaqsy áke. Al Álibı bul kesirdi “óz tilinen” tapty. Qaırattyń ashýyna tıgen bolýy kerek. Álibı qurbymmen kafede otyrǵanymda kózdi ala bere qasymyzǵa kelip, telefonymnan ózine qońyraý tastady. Osylaısha maǵan kúnde habarlasyp mazamdy alýmen boldy. Balalar úıinenmin, jesirmin dep aıaýshylyǵymdy oıatqysy keldi. Men onyń ákesi baryn bilgende tańyrqap qaldym”, – deıdi “Astana arýy”.

Isına  Jamalıevpen 7 jyl birge turyp, 5 jasar ul tárbıelep otyrǵanyn jasyrmady. 25 jastaǵy “arý” “tobyrymen talaıtyn ıtter” sıaqty tap bergen qoǵamdy meıirimdirek bolýyn surady.

Aınur Jamalıevtiń alty bala tárbıelep otyrǵan parasatty áke ekendigin aıtyp, Álibıdiń bul isin “aldyn-ala oılastyrylǵan tuzaq” dep esepteıtinin jasyrmady.

“Álibı aqsha úshin bárine baratyn adam. Ol maǵan eki adamdy óltirgenin aıtyp, ózin Alhan dep tanystyrdy. Sodan keıin, men ol adamnan qatty qorqamyn”, – dep sózin túıindedi Isına.