Óz týysynan zábir kórgen semeılik jetim jigit mal sońyna salynyp, odan qalsa ózgelerge jalshylyqqa jiberilgen. Bala kezinde "aqyl-esi durys emes" dep tanylǵan jarymjan balaǵa apasy qamqorlyq jasaýdyń ornyna, qorlyq kórsetipti. Qazir myńǵyrǵan malmen ómirin ótkizgen jas jigit ápkesin panalap otyr. Bul týraly Eýrazıa birinshi arnasy habarlady.

Esenbek Rahmetov ata-anasynan erte aırylyp, 15 jasynda jetim qalǵan. Ony Qaınar aýylyndaǵy naǵashy apasy asyrap alypty. Alaıda, alǵashynda "esh jamandyq kórmeısiń" dep ýádeni úıip-tókken týysy balany lezde aýrýlar qataryna qosyp, anyqtama jasatypty. Osylaısha, aıaq asty esi durys emester qataryna qosylǵan bozbala qystaqta mal baǵyp, malaıdyń  qamytyn arqalaǵan. 

“Qashqanda Ejik apam ózi demalysqa jibermedi. Mamyrdan bastap ózim habarlastym talaı. Biraq jibermedi. 4-5 aı ótti, úndegen joqpyn. Sonymen ketýge týra keldi. Demalysqa jibermese kim shydaıdy oǵan 1 jyl? 280 myńdy aǵama qaıtadan qaıtar qaryzyńdy jaýyp berem. Myna apam aqshamdy ótep berse boldy”, – deıdi quldyqta bolǵan jigit Esenbek Rahmetov.

Esenbektiń sózinshe mal baǵýmen bar ýaqyty ótse de, oǵan beriletin tıyn-tebendi naǵashy apasy alyp júrgen. Tipti ústine kıer jóni túzý kıimi joq ekenin aıtady. Byltyr 2 iri qarany urlatyp, qojalyqqa 280 myń teńge qaryz bolyp qalǵan. Al ózge qystaqtyń adamdary talap etip kelgende, apasy jetim jigittiń ózin saýdalaǵan. "Maldyń qunyn osynyń ózin jumsap óndirińder" degen kórinedi. Alaıda jalshylyqtan jaýyr bolǵan Esenbek  jaqyndaryna qashyp qutylypty. Biraq, naǵashy apaıy "men jaqsylyqtan basqa jasaǵanym joq" dep azar da bezer boldy.

"Ózimniń týystyq paryzymdy ótep otyrmyn. Basqa eshqandaı nıetim joq. Qaıta bulardy ómirge talpyndyryp, kózin ashyp otyrmyn. Áke-sheshesi bar kezde de oqymaǵan. 280 myń degendi bilmeımin. Kerisinshe, men olardy kıindirdim, tamaq berdim, sý berdim. Basqa eshnárseni bilmeımin" – deıdi Esenbektiń naǵashy apasy Elsharban Ahmetova.

Al Esenbektiń týǵan ápkesi inisine múgedektigi úshin tólenetin memlekettik kómekti áli naǵashy apaıy Elsharban Ahmetovanyń ıemdenip otyrǵanyn aıtady. Esenbek úıine qansha barǵanmen, tólqujatyn qaıtarmaı áýre-sarsańǵa túsirip júr eken. Polısıa bolsa únsiz. "Tekserý jumystary júrip jatyr" dep syltaý aıtýmen qutylatyn kórinedi.

“Ol tek aqsha úshin ustady. Buǵan kómek úı beriledi, aqsha beriledi. Sonyń bárin ózi alǵysy keldi. Bul balany qaraǵan joq. Báribir qystaqqa jiberip, aılyǵyn ózi alyp otyrdy. Bizge tamyzda qashyp kelgeninde kartochkasyn birden buǵattap tastadyq. Ol kisnińi qolynda pasport bolǵandyqtan ashyp alypty. Sóıtip jınalǵan 4 aıdyń aqshasyn alyp aldy” – deıdi Esenbektiń ápkesi Sholpan Qusaıynova.

Esenbektiń týǵan ápkesi deni saý baýyryn "aýrý" dep, jumysqa jekkeni úshin týysqany Alsharban Ahmetovaǵa ókpeli. Qara jumysqa salǵany bylaı tursyn, ash-jalańash qaldyrǵan deıdi. Onyń tapqan aqshasyn qaltasyna basyp otyr dep nalıdy. 

“Atalǵan tulǵa boıynsha keletin bolsaq, endi ol zańmen belgilenedi. Sodan keıin arnaıy komısıa qaraıdy. Árıne eger taǵy basqa týystary tabylyp, sol ózine ótinish jasap osyǵan bir yqylas bildirip jatsa ol zańmen qaralyp, tıisti jańaǵy quzyrly organdarmen kelise otyryp, másele sheshiledi” – deıdi qalalyq jumyspen qamtý jáne áleýmettik baǵdarlamalar men azamattyq hal aktilerin tirkeý bólimi basshysynyń orynbasary Azamat Qurmanǵalıev.

Jaýapty organ ókilderi bul máseleniń uzaqqa sozylmaı sheshiletinine senimdi. Eger aqyl-esi kem dep tabylǵan tulǵanyń ózge de janashyrlary tabyla turyp, qamqorlyqqa alýdan bas tartsa, ol memlekettiń qaramaǵyna ótýi tıis degen sheshimdi alǵa tartty. Al jasy endi 22-ge kelgen jas jigit bilim alyp, shańyraq qurýdy armandaıdy.