Ádilet mınıstrliginiń Sot saraptamalary ortalyǵy respýblıkalyq memlekettik qazynalyq kásipornynyń Almatydaǵy Ońtústik-SHyǵys óńiri boıynsha fılıaly aldy áp-sátte shýǵa ulasty, dep jazady Zanmedia.kz.
Bizdiń túsirilim top beımálim oqıǵanyń kýási boldy. Sporttyq kıim kıgen belgisiz bireýler eshqandaı qujat kórsetpesten Almaty turǵyny, ekinshi top múgedegi Danıar Qoıbaǵarovty úıinen qatygezdikpen ustap, erkinen tys psıhıatrıalyq saraptama ortalyǵyna kúshtep aparmaq bolǵan. Onyń senimdi ókili Marıa Basarabtyń aıtýynsha, «Qaraǵandy oblysynan kelgen tergeýshilermiz» degen úsh jigit buǵan qandaı negiz sebep bolǵanyn túsindirýden bas tartqan. Sebebi, Qoıbaǵarulyna qatysty eshqandaı qylmystyq is tirkelmegen, sondyqtan ony májbúrlep psıhıatrıalyq saraptamaǵa jiberýge quqyqtyq negiz joq.
«Qoıbaǵarov – ekinshi toptaǵy múgedek. Onyń úıine basa-kóktep kirýge eshqandaı sot qaýlysy, prokýror sanksıasy da joq. Ne úshin?» degen Basarab bul oqıǵany Qoıbaǵarovtyń jýyrda «AKKON» JSHS-ne qarsy utqan sot isimen tikeleı baılanystyrady. Sot sheshimi boıynsha kompanıa azamatqa qomaqty ótemaqy tóleýi tıis. Basarabtyń pikirinshe, kompanıa ókilderi Qoıbaǵarovty «aqyl-esi durys emes adam» dep tanýǵa tyrysyp, tólem jasaýdan jaltarmaq.
Oqıǵanyń kýágerleri men zańgerler jedel túrde jergilikti polısıa qyzmetkerlerin shaqyrdy. Alaıda, polısıa kelgende ǵana sporttyq kıim kıgen azamattar ózin «polısıa tergeýshilerimiz» dep tanystyryp, qyzmettik kýálikterin kórsete bastady. Degenmen, advokat Alma Mýsına olardyń áreketteriniń zańdylyǵyn surap, osy kúsh qoldaný sharalary qandaı qujatqa negizdelgenin naqtylaýdy talap etken kezde, olar bul suraqqa jaýap berýden bas tartty. Advokattyń kúshtep saraptamaǵa jiberý týraly sot qaýlysyn kórsetý týraly talabyna quqyq qorǵaý organdary jaýap bermedi.
Almaty qalalyq advokattar alqasynyń advokaty Alma Mýsınanyń aıtýynsha, eshqandaı qujat kórsetken joq. «Men bul áreketterdi zańsyz dep sanaımyn. Ókinishke qaraı, elimizde quqyq qorǵaý organdarynyń áreketteri jıi zańsyz sıpatta bolady. Biz, advokattar, bul týraly jıi aıtyp júrmiz. Biraq zańsyzdyqtyń aldyn alýǵa baǵyttalǵan tıisti sharalar árqashan qabyldana bermeıdi», – dedi.
Sodan keıin ǵana Qaraǵandy oblysy polısıa departamenti tergeý basqarmasynyń polısıa maıory Abaı Qabyken: «Men Almatyda departament basshysynyń buıryǵymen júrmin. Meniń barlyq áreketim zań aıasynda júzege asýda. QR Qylmystyq-prosestik kodeksiniń 201-baby boıynsha «Sotqa deıingi tergep-tekserý derekterin jarıa etýge jol berilmeıdi» deýmen ǵana shekteldi.
Oqıǵa ornyna kelgen ýchaskelik polıseıler men advokattar óz pozısıasyn bildirip, zań buzýshylyqqa jol berilmeýi tıis ekenin atap ótti. Advokattyń kúshtep saraptamaǵa jiberý týraly sot qaýlysyn kórsetý týraly talabyna quqyq qorǵaý organdary jaýap bermedi.
Sońynda oqıǵaǵa qatysy bar barlyq azamattar ary qaraı tekserý úshin polısıa bólimine jetkizildi. Danıar Qoıbaǵarulynyń týystary men jaqyndary ádildikke qol jetkizemiz dep otyr. Olar ony zańsyz túrde kúshtep alyp ketýge talpynys jasalǵany týraly shyndyqty qoǵamǵa jetkizýge bar kúshin salmaq.
