Ǵalam Qytaıdan seskenedi. Jyl saıyn «Qytaı qaýpi» degen másele barsha adamzatty alańdatyp otyr. Tipti bul jaǵdaı muhıttyń ar jaǵyndaǵy Amerıkany da mazalaı bastady. Desek te, álemdik sarapshylardyń baǵalaýynsha, Qytaıdyń ıadrolyq arsenaly onsha kóp emes. Azıadaǵy eń qýatty memleket sanalatyn Qytaıda 300 –deı ıadrolyq oqtumsyq bar. Al AQSH pen Reseıde mundaı oqtumsyqtardyń sany shamamen alǵanda 7 myńdaı.  Biraq amerıkalyq áskerı mamandardyń esebinshe, Qytaıdyń birneshe sýasty bombasynyń ózi AQSH-qa orasan zor shyǵyn ákeledi. Onyń ústine olar shamaly ýaqyt buryn jańadan jańadan raketalyq oqtumsyqty synaqtan ótkizdi. Jańa qarý AQSH-tyń terıtorıasyna emin-erkin jetedi. Amerıka áskerıleriniń de alańdap otyrǵany osy. Atalǵan JL-3 ıadrolyq oqtumsyǵy Sary teńizde synaqtan ótkizildi jáne ol 9 myń shaqyrym qashyqtyqqa ushyp bara alady.  Árıne bul amerıkalyq jáne reseılik raketalarǵa qaraǵanda álsizdeý. Ázirge Qytaıdyń sýasty floty týraly aqparat az. Pentagonnyń habarlaýyna qaraǵanda, olardyń Jin tıptegi tórt sýasty qaıyǵy bar. 2020 jyldan keıin Qytaı teńiz áskerı kúshin kúsheıtýdi kózdep otyr. Demek, aldaǵy ýaqytta AQSH-pen básekeles kúsheıe túsedi. Buǵan negiz de bar. Aldaǵy ýaqytta Qytaı amerıkalyq oqtumsyqtarmen básekelese alatyn JL-3 tıpindegi 12 myń shaqyrymdyq ıadrolyq oqtumsyqtardy óndiristen shyǵarýdy josparlap otyrǵan kórinedi. Al Qytaıdyń qazirgi qoldanystaǵy JL-2  tıpindegi ıadrolyq oqtumsyqtary 7400-8000 shaqyrymǵa jetedi. Munyń ózi Eýropanyń birqatar bóligin, AQSH-tyń úlken aýmaǵyn, Úndistan men Reseıdiń barlyq aýdandaryn joıyp jibere alatynyn aıta ketý kerek.