Almaty oblysynda 28 jastaǵy er adamnyń ólimine sebepker bolǵan degen halyq emshisi qamaýǵa alyndy, dep habarlaıdy Tengrinews.kz tilshisi oblystyq polısıa departamentine silteme jasap.

Oqıǵa 12 qańtarda Qarasaı aýdanynda bolǵan. Er adam óz úıinde óli tabylǵan. Sot-medısınalyq tekserýiniń nátıjesinde keýde qýysynyń tuıyq jaraqaty, qabyrǵalarynyń synýy men ókpeniń jaraqattanýy er azamattyń ólimine sebepker bolǵany anyqtalǵan. Jábirlenýshige túrli aýyr dene jaraqatyn salý barysynda onyń ólimine ákelýge qatysy bar degen kúdikpen polıseıler halyq emshisiniń ústinen qylmystyq is óndirisin qozǵady.

"Polısıaǵa qaıtys bolǵan azamattyń týystarynan áli kúnge aryz túsken joq. Alaıda bul derek boıynsha RQ Qylmystyq kodeksiniń 106-baby 3-tarmaǵyna sáıkes sotqa deıingi tergeý amaldary júrgizilip jatyr. Qylmystyq iste kúdikti retinde dástúrli emes medısına qyzmetimen aınalysatyn 63 jastaǵy er adam aıyptalyp jatyr", - dep atap ótti Almaty oblysy polısıa departamentiniń baspasóz qyzmeti.

Aıta keteıik, halyq emshisine jábirlenýshini onyń týystary alyp kelgen. Olardyń pikiri boıynsha, jas azamatqa jyn kirgen jáne ol sońǵy úsh jyl ishinde sol jyn áserinen qıyndyq kórgen. Halyq emshisiniń 5 kún ishinde túrli ádisterdi qoldaný arqyly azamattan jyndy shyǵarý saldarynan jábirlenýshiniń kóz jumýy múmkin delinedi.

"Bul is Qarasaı aýdany polısıasynyń óndirisinde. Kúdikti ýaqytsha ustaý oqshaýlaǵyshyna qamaqqa alyndy", - dep oblystyq polısıa baspasóz qyzmeti tolyqtyrady.