Dýbaıda qazaq áıeli soqqyǵa jyǵyldy. 37 jastaǵy Nurgúl Nurǵalıeva ol jaqqa jumyspen barǵan eken. Oqıǵa 1 aı buryn sol qaladaǵy qonaq úılerdiń birinde bolǵanymen, bul týraly endi ǵana aıtylyp jatyr. Dýbaıǵa qydyryp barǵan Qazaqstan azamattarymen jolyǵý úshin Nurgúl taksı shaqyrtyp, qonaq úıge barady. Dittegen jerine kelgen soń, júrgizýshi otandasymyzdyń artynan baıqatpaı erip kelip, lıftiniń ishinde tepkiniń astyna alypty. Keıin qolyndaǵy aqshasyn alyp, izin sýytqan. Al aýyr soqqydan áıeldiń bas súıegi men jaǵy synyp, jansaqtaý bólimine jetkizilgen. 16 kún boıy komada jatqan otandasymyz qazir beti beri qarap, aýrýhanadan shyǵaryldy. Kúdikti de ustalyp, tergeý jumystary júrip jatyr. Nurgúl áli de sol Dýbaıda. Al onyń Almatydaǵy týystary jasalǵan em-domǵa qajetti qarjyny jınaýǵa halyqtan kómek surap otyr. “Alǵashqy medısınalyq kómek kórsetkenderi tegin eken. Al, qalǵany emdegeni, jasaǵan operasıasy bar, komasy bar sonyń bárine 15 myń dollardaı kerek. Sony  tólemeıinshe, eshqaıda shyǵa almaıdy”, – deıdi Nurgúldiń inisi Berik Nurǵalıev.