Nazarlaryńyzǵa meniń bir tanysymnyń oqıǵasyn usynbaqpyn.

Ózi Batys Qazaqstan oblysynyń arýy, alaıda taǵdyrdyń aıdaǵany ǵoı, ońtústiktiń jigitin súıip qalyp, soǵan turmysqa shyqty. Qazir bir qyz ósirip otyrǵan ata-ana. Kúıeýiniń otbasymen Astanada turady.

Álgi tanysymnyń kelindik ómiri qalaı ótip jatyr deısizder ǵoı: uıqysynan tańǵy 5-te turady da, qaıyn atasyna, enesine, kúıeýine jáne onyń baýyryna tańǵy as ázirleıdi. Dastarhan jaınap turýy tıis: samsa, qýyrdaq, shaı, nan, táttiler... Bári jańadan pisken bolýy tıis. Ol úshin kelin, árıne, 1-2 saǵat buryn erte turady.

Sóıtip ata-enesinen ózgesiniń bári jumystaryna attanady. Meniń tanysym eki jerde jumys isteıdi: keńse tazalaýshy ári meıramhanada ydys jýýshy. Jumystan úıge sharshap, qajyp qaıtady. Úıine keledi de taǵy sol jumysy bastalady. Tamaq ázirleý, ydys jýý, úı jınaý. Aıtpaqshy, úıinde ne kir jýý máshınesi, ne shańsorǵyshy joq. Bárin óz qolymen jýady. Otbasynda ózge bir de bir jan úı tirshiligine aralaspaıdy. Keshke tamaqtanady, shaı ishedi, teledıdar qaraıdy, erer qaýymy fýtbol tamashalaıdy, enesi serıal kóredi. Al kelin bárine qyzmet jasaıdy. Otbasynyń árbir múshesiniń ár kıimin, senesizder me, tipti ish kıimin de qolymen jýady. Kepken soń útikteıdi, sórelerine jınastyrady. Al munyń bárine túnde, tamaq ishilip, ydys jýylyp bolǵan soń kirisedi. Tańǵy 5-te qaıtadan turady.

Osyǵan qaramastan kelinniń orny tómende, otbasynyń baqyty, berekesi úshin tańnan keshke deıin shapqylap júrgen tanysym otbasy múshelerinen tómen sanalady. Máselen, ol ústel basynda ózgelerdiń áńgimesine arala almaıdy. Únsiz ǵana shaıyn iship otyrýy tıis. Otyratyn orny, álbette, bosaǵada, samaýrynnyń janynda. Ol ata-enesiniń kózine tik qaramaýy tıis, tipti qaıyndarynyń da... Otbasy toı-tomalaqqa nemese tabıǵatqa demalýǵa shyqqanda kelin úıde qalady. Oǵan demalýǵa bolmaıdy, úı sharýasyn qadaǵalaýy tıis.

Tanysymnan birde «nege qul sekildi ómir súrip júrsiń, nege kúrespeısiń?» dep. Ras qoı, turmysqa shyǵarda, osyndaı ómirdi armandamaǵan bolar? Óz erkimen ózin qalaısha quldyqqa ıtermeledi?

«Bilmemin» deıdi. Aıtýynsha, birden bulaı bola qoımaǵan. Jańa otbasy kelinin mundaı ómirge birte-birte úırete bastaǵan. Al qazir sharýaǵa boıy úırenip te qalypty. Sebebi, qyzmet etip júrgen adamdary – óziniń otbasy.

Biraq basqasha da ómir súrýge bolady ǵoı, erkin, ózgelermen teń áıel bolýǵa umtylý kerek qoı. Tipti ne dep jaýap beretinin de bilmeıdi. Onyń ústine kúıeýiniń mahabbatyna senedi, ózi de súıemin dep oılaıdy. Ne bolmasa óz oıynan ózi qorqady: qazir ajyrasyp ketse, eshqashan turmysqa shyǵa almaı qalady, qoǵamda mártebesi túsedi, tanystary sóz etedi. Erkin ári jalǵyz bolǵansha, óz otbasynda qul bolǵany artyq. Mine, onyń oıy – osyndaı.

-Aıtshy, - dedim tózimim taýsylǵan men, - ata-eneń jastary kelip, bir kúni ómirden óter, balalaryń er jetip, boı jeter. Sol kezde sende osy dástúrdi jalǵastyrasyń ba ? Sen de kelinińdi qulsha jumsaısyń ba?

Bul suraǵym da jaýapsyz qaldy. Sebebi ózin bir úıdiń ıesindeı sezine almaıdy áli.

Al názik qana qurbymnyń sondaı qatal, aıaýsyz bolyp ketetinine sene almaı men turmyn.

Marat Tolybaevtyń Facebook-tegi paraqshasynan

Usynǵan: Gúlim Jaqan