«Qazposhta» AQ tólem kartalaryn ustaýshylar úshin post.kz arqyly tólemderge komısıany joıdy. Bul týraly «Qazposhta» AQ Basqarma tóraǵasy Sáken Sársenov óziniń Facebook paraqshasynda jazdy.

Atalǵan jańalyq tutynýshylar tarapynan týyndaǵan pikirlerden soń júzege asqan.

«Men poshta bólimshelerine kelip, onda kezekke turyp komýnaldyq nemese salyq tólemderin jasaýdy unatpaıtyn adamdardyń pikirin jelide jıi kórem. Ondaı onlaın qyzmet alýǵa úırengen mobıldi azamattarymyz úshin post.kz portalyn iske qosyp damytyp jatqanymyzdy aıtqym keledi», – deıdi S. Sársenov.

Osylaısha, tólem kartalaryn qoldanatyn poshta tutynýshylary post.kz arqyly zeınetaqy jarnalaryn, mindetti medısınalyq saqtandyrý jarnalaryn, áleýmettik tólemderdi, komýnaldyq jáne basqa da tólemderdi komısıasyz tóleı alady. Bul tólem kartalary barlarǵa ǵana qatysty. Al ózge klıentter úshin komısıa kólemi ózgerek.

«Portaldyń qyzmetterin paıdalanatyn qalǵan klıentterimiz endi uıaly baılanys úshin 50 teńge, komýnaldyq tólemder úshin - 100 teńge, zeınetaqy jarnalary, mindetti medısınalyq saqtandyrý jáne áleýmettik tólemder úshin - 1%, biraq 100 teńgeden kem emec komısıa tóleıdi», – dep jazdy ol.

Aqparat úshin aıta ketsek, post.kz-ta sálemdemelerdi qadaǵalaýǵa, poshtamatqa jiberýge, poshta bólimshesine barý ýaqytyn brondaýǵa bolady. Sondaı-aq, poshtalyq jáne qarjylyq qyzmetter úshin de túrli tólemder jasaı alasyz.