Qazaqstanda emdeýge kelmeıtin, elimizde qoldanylmaıtyn ádister men tehnologıalardy talap etetin aýrýlar bar. Ondaı naýqastardyń memlekettik búdjet esebinen, shetelde tegin emdelýge múmkindigi bar. Sonymen shetelde memleket esebinen kimder emdele alady? Ol úshin qandaı qujattar talap etiledi?

«Búdjet qarajaty esebinen shetelderdegi ozyq klınıkalarǵa emdeýge jiberiletin azamattardyń sanaty men aýrýlardyń tizimi Densaýlyq saqtaý mınıstriniń tıisti buıryǵymen bekitilgen. Oǵan negizinen otandyq medısına uıymdarynda emdelgen, biraq qoldanystaǵy emdeý tásilderi oń nátıje bermegen naýqastar jatady. Sheshim qabyldaý barysynda 18 jasqa deıingi balalarǵa, aıryqsha jaǵdaılarda qyzmet babynda aýyr jaraqat alǵan áskerı qyzmetshiler men quqyq qorǵaý organdarynyń qyzmetkerlerine basymdyq beriledi», - deıdi Medısınalyq saqtandyrý qorynyń basqarýshy dırektory Zabıra Orazalıeva.

Aıtýynsha, aýrýlardyń tizbesine negizinen aǵzalar men tinderdi almastyrýdy qajet etetin aýrýlar, sondaı-aq onkologıalyq aýrýlar, óńesh, keńirdek stenozdary t.b. kiredi. Onyń ishinde, radıohırýrgıalyq ádispen emdeýdi, ıaǵnı gamma pyshaqty talap etetin mı isigi, arterıalyq anevrızmder, kózdiń qaterli isikteri bar (tolyq tizim: http://adilet.zan.kz/kaz/docs/V1700016107)

Densaýlyq saqtaý mınıstrligi álemniń jetekshi klınıkalarymen jumys isteıdi. Olardyń qatarynda Germanıa, Izraıl, AQSH, Ońtústik Koreıa, Túrkıa, Japonıa, Fransıa, Ispanıa, Chehıa, Ýkraına, Reseı, Belarýs, Úndistan, Sıngapýr sıaqty elderdiń alldyńǵy qatarly medısına ortalyqtary bar. 

Gúlzıra Jibekenova