Túrkistan oblysyndaǵy Myrzashól óńiriniń halqy Elbasydan Asyq ata aýdanyn qaıta qurýdy surap otyr, dep jazady Qamshy.kz aqparat agenttigi. 

Osyǵan oraı L.N. Gýmılev atyndaǵy Eýrazıa ulttyq ýnıversıteti Teleradıo jáne qoǵammen baılanys kafedrasynyń dosenti Myrzantaı Jaqyp áleýmettik jelidegi paraqshasynda Elbasyǵa qaratyp jazba jarıalady.

"Qazaqstan Respýblıkasynyń Prezıdenti
Nazarbaev Nursultan Ábishulyna

Asa qurmetti Nursultan Ábishuly!

Sizdiń 2019 jylǵy 27 aqpan kúni ótkizilgen «Nur Otan» partıasynyń kezekti XVIII sezindegi elimiz boıynsha halyqtyń ómir súrý sapasyn jaqsartýǵa baǵyttalǵan óńirlik saıasatty júzege asyrý maqsatyndaǵy, Qazaqstannyń árbir óńiri strategıalyq turǵydan mańyzyn eskere otyryp, ómir súrý sapasy boıynsha jetildirilgen óńirlik standarttaryna negizdelgen Úkimetke berilgen elimizdiń Jańa Kartasyn qalyptastyrý qajettigi týraly tapsyrmalaryńyzǵa Túrkistan oblysyndaǵy Myrzashól óńiriniń jurtshylyǵy ystyq yqylaspen qyzý qoldaý bildirip otyr.

Ózińizdiń 2018 jylǵy 5 maýsymdaǵy № 698 Jarlyǵyńyzben Maqtaaral aýdanyn bólý jolymen ákimshilik ortalyǵy Jetisaı qalasyndaǵy Jetisaı aýdany, ákimshilik ortalyǵy Myrzakent kentindegi Maqtaaral aýdany qurylǵanyn, sonymen birge Sizdiń 2018 jylǵy 19 maýsymdaǵy № 702 «Qazaqstan Respýblıkasynyń ákimshilik-aýmaqtyq qurylysynyń keıbir máseleleri týraly» Jarlyǵyńyzben oblystyń resmı ataýy Túrkistan oblysy dep ózgertilip, óńirdiń ákimshilik ortalyǵy Shymkent qalasynan Túrkistan qalasyna kóshirilýin de jergilikti halyq erekshe qýanyshpen qarsy aldy.

Sizdiń «Nur Otan» partıasynyń XVIII sezinde usynǵan halyqty áleýmettik qoldaýdy kúsheıtýge jáne azamattardyń turmys sapasyn arttyrýǵa arnalǵan sharalaryńyzdy, osy maqsatqa búdjetten jáne Ulttyq qordan qomaqty qarjy bólý týraly Úkimetke bergen tapsyrmalaryńyz boıynsha bul qarajat az qamtylǵan azamattarǵa áleýmettik qoldaý kórsetý isin kúsheıtý, halyqtyń áleýmettik turǵydan álsiz toptarynyń baspana jaǵdaıyn jaqsartý múmkindikterin arttyrý jáne óńirlerdi damytý saıasatyn túbegeıli ózgertý sekildi mańyzdy mindetterdi sheshýge baǵyttalýy Myrzashól óńiriniń halqyna aıryqsha qulshynys syılap otyr.

Sondaı-aq 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna joldaýyńyzda: «Elimizdiń aýmaqtyq damýyna jańa tásilder engizýdi qamtamasyz etý qajet», - dep atap kórsete otyryp, 2019 jyldyń 1 qyrkúıegine deıin Elimizdiń 2030 jylǵa deıingi aýmaqtyq-keńistiktik damýynyń boljamdy sqemasyn jáne Óńirlerdi damytýdyń 2025 jylǵa deıingi pragmatıkalyq baǵdarlamasyn ázirleýdi tapsyrǵan edińiz.

Osyǵan oraı, Ózińizdiń 1997 jylǵy 24 sáýirdegi № 3474 Jarlyǵyńyzben taratylǵan Myrzashól óńirindegi Asyqata aýdanyn qaıta ashý máselesi qazirgi kezde óte ózekti bolyp otyr.

Sizdiń tapsyrmańyzben Myrzashól óńiri jurtshylyǵynyń talap-tilekteri boıynsha tıisinshe qajetti qujattar daıyndalyp, «Elektrondyq úkimet» veb-portalynda 2018 jylǵy 23 aqpanda Elbasymyz – Qazaqstan Respýblıkasynyń Prezıdenti Nursultan Ábishuly Nazarbaevtyń Ońtústiktegi Maqtaaral jáne Saryaǵash aýdandaryn bes aýdanǵa bólip, burynǵy Maqtaaral, Jetisaı, Asyqata, Saryaǵash jáne Keles aýdandaryn qalpyna keltirý týraly arnaıy Jarlyǵynyń, al 2018 jylǵy 28 aqpan kúni «Elektrondyq úkimet» veb-portalynda tıisinshe Qazaqstan Respýblıkasy Úkimetiniń «Ońtústik Qazaqstan oblysy Asyqata, Keles, Jetisaı, Maqtaaral jáne Saryaǵash aýdandarynyń shekaralaryn belgileý týraly» qaýlysynyń jobalary jarıalanǵan bolatyn.

Joǵaryda atalǵan mańyzdy resmı qujattardyń jobalarynda jáne ǵalymdardyń ǵylymı saraptamalyq usynystarynda Myrzashól óńirindegi 1997 jyly bir aýdanǵa biriktirilgen úsh aýdandy da – Maqtaaral, Jetisaı jáne Asyqata aýdandaryn burynǵy tarıhı qalpyna keltire otyryp úsh aýdan etip qaıta qurý – qazirgi ýaqyt talaby ekeni, óıtkeni qajetti aqparatty halyqqa der kezinde jetkizý, qadaǵalaý, baqylaý, halyqqa qyzmet kórsetý tıimdiligi artatyny erekshe atap kórsetilgen edi.

Ǵylymı sarapshylardyń tujyrymdaryna súıensek, saıası turǵydan alǵanda, qazirgi tańda burynǵy Asyqata aýdanynyń ashylmaı qalýy saldarynan Myrzashól óńiriniń keıbir eldi mekenderinde, ásirese, shalǵaıda ornalasqan aımaqtarda ekonomıkalyq-áleýmettik máselelerdi sheshýdegi oń ózgerister óte baıaý júrgizilip jatyr.

Halyq sanynyń kóptigine baılanysty eldi mekenderdi jedel basqarýda da kóptegen qıyndyqtar týyndap otyr. Bul jaǵdaı, ásirese, shalǵaıdaǵy aýyldardaǵy áleýmettik ınfraqurylymdardyń jedel damýyna keri áserin tıgizýde. Qazirgi talapqa saı kúndelikti atqarylyp jatqan jumystardy tekserip, baqylap otyrý men qordalanyp qalǵan kúrdeli máselelerdi der kezinde, jedel sheshýde qolbaılaý bolatyn jaǵdaılar kóbeıip, qıyndyqtar týǵyzýda.

Qarapaıym halyq keıde qajetti anyqtamalardy nemese basqa da qujattardy alý úshin sonaý shalǵaıdaǵy eldi mekenderden áýre-sarsańǵa túsip, qazirgi aýdan ortalyǵy Jetisaı qalasyna qatynaýyna týra kelip otyr. Bul rette jurtshylyq aýdan ortalyǵyna barý úshin aldymen burynnan qalyptasqan burynǵy aýdan ortalyǵy Asyqata kentine jetip, sodan keıin ǵana Jetisaı qalasyna qatynap júr.

Myrzashól óńirinde turyp jatqan jergilikti halyqtyń áleýmettik jaǵdaıyna jáne aımaqtyń ekonomıkalyq damýyna boljamdyq saraptama jasaǵan ǵalymdar men bilikti sarapshy-mamandardyń 1997 jyly bir aýdanǵa biriktirilgen burynǵy Maqtaaral, Jetisaı jáne Asyqata aýdandarynyń úsheýin de qaıta qalpyna keltirý qajettigi týraly joǵaryda baıandalǵan usynystary men qorytyndylaryna qaramastan, 20 jyldan astam ýaqyt boıy sol kezdegi ekonomıkalyq qıyndyqtardyń saldarynan ýaqytsha bir aýdanǵa biriktirilgen Maqtaaral jáne Jetisaı aýdandary 2018 jylǵy 5 maýsymda qaıta ashyldy da, al Asyqata aýdany qurylmaı qaldy, tarıhı qalpyna keltirilmedi.

Osyǵan baılanysty Myrzashól óńiriniń halqy Sizden Ózińizdiń 1997 jylǵy 24 sáýirdegi № 3474 Jarlyǵyńyzben taratylǵan Asyqata aýdanyn qaıta ashyp berýińizdi ótinip otyr.

Eger Myrzashól óńirin ıgerý jumystary qarqyndy júrgizilgen tusta – sonaý 1940 jylǵy 10 qarashadaǵy Qazaq KSR Joǵarǵy Keńesi Tóralqasynyń arnaıy Jarlyǵymen qurylǵan, kelesi jyly shańyraq kótergenine 80 jyl tolatyn, ókinishke qaraı, 1997 jyly jabylyp qalǵan Asyqata aýdany qaıtadan qurylatyn bolsa, onda Myrzashól óńirindegi aımaqtardy basqarý júıesiniń sapasy artyp, tıisinshe memlekettik baǵdarlamalar men Úkimetten, oblystan kelgen tapsyrmalardyń oryndalýyna baqylaý jasaý da jaqsara túser edi.

Asyqata aýdanynyń qaıta ashylýy Myrzashól óńirindegi eldi mekenderdegi halyqtyń ózekti áleýmettik máselelerin jáne ınfraqurylymdarmen qamtamasyz etý mindetterin jedel jáne sapaly sheshýge septigin tıgizer edi.

Eger Asyqata aýdany qaıta qurylatyn bolsa, onda Asyqata aýdanynyń quramyna 93 myńnan astam halyqty qamtıtyn 1 kent (aýdan ortalyǵy Asyqata kenti), 7 aýyldyq okrýg, 83 eldi meken engizilip, al Jetisaı aýdanynyń quramyna 103 myńnan astam halyq, 1 qala (qazirgi aýdan ortalyǵy Jetisaı qalasy), 6 aýyldyq okrýg, 42 eldi mekendi óz aldyna bólek aımaq retinde basqarý jeńildeıtin edi.

Eger Asyqata aýdany qaıta qurylatyn bolsa, onda Asyqata aýdanynyń aýmaǵy 64 435 gektardy, al Jetisaı aýdanynyń aýmaǵy 55 992 gektardy quraıtyn edi.

Elimizdiń halyqaralyq dárejedegi mártebesi jańa sapalyq deńgeıge kóterilip, Ózbekstan Respýblıkasymen shekaralas aýdandarda úsh aýdannyń – Maqtaaral, Jetisaı jáne Asyqata aýdandarynyń bolýy elimiz ekonomıkasynyń óndiristik jáne beıóndiristik salalarynyń alǵa qaraı qaryshtap damýyna jańa serpin berip, sonyń nátıjesinde Myrzashól óńiriniń halqy arasyndaǵy jumyssyzdyq deńgeıin anaǵurlym tómendetýge qol jetkizýge múmkindik beretin edi.

Jetisaı aýdanynyń ákimshilik ortalyǵy Jetisaı aýdanynda qalatyndyqtan, qosymsha búdjet shyǵyndary ortalyǵy Asyqata kenti bolatyn Asyqata aýdanyn ashýǵa jumsalatyn edi.

Sonymen birge Myrzashól óńiriniń jergilikti halqy Sizden mynadaı máselege de nazar aýdarýyńyzdy surap otyr.
Resmı málimetter boıynsha búginde Atakent kentinde – 18 myńnan astam, Myrzakent kentinde – 15 myńǵa jýyq, Asyqata kentinde – 12 myńnan astam halyq turady.

Osyǵan oraı, «Qazaqstan Respýblıkasynyń ákimshilik-aýmaqtyq qurylysy týraly» Qazaqstan Respýblıkasynyń 1993 jylǵy 8 jeltoqsandaǵy № 2572-XII Zańynyń 3-shi babyna sáıkes aýdandyq mańyzy bar qalalarǵa aýmaǵynda ónerkásip oryndary, komýnaldyq sharýashylyq, memlekettik turǵyn úı qory, oqý jáne mádenı-aǵartý, emdeý men saýda obektileriniń damyǵan jelisi bar, halqynyń sany keminde 10 myń adam bolatyn, halqynyń jalpy sanynyń úshten ekisinen astamyn jumysshylar, qyzmetshiler jáne olardyń otbasy músheleri quraıtyn eldi mekender jatatynyn eskere kelip, Myrzakent, Atakent jáne Asyqata kentterine qala mártebesi berilse, durys bolar edi.

Myrzashól óńiriniń halqy Sizden Ózińiz «Nur Otan» partıasynyń XVIII sezinde Úkimetke bergen tapsyrmalaryńyz boıynsha áleýmettik salaǵa, onyń ishinde shaǵyn jáne monoqalalardy damytý úshin jyl saıyn bólineıin dep otyrǵan 10 mıllıard teńge qarjydan Myrzakent, Atakent jáne Asyqata kentterine qala mártebesin berip, atalǵan eldi mekenderdi damytýǵa da tıisinshe qarajat bólinýin surap otyr.

Buǵan qosa Sizdiń arnaıy tapsyrmańyzben 2025 jylǵa deıin oblystyq jáne aýdandyq mańyzdaǵy joldardy jóndeý jumystaryn júzege asyrý úshin qosymsha bólinetin 350 mıllıard teńge qarjydan Myrzashól óńirin Shymkent jáne Túrkistan qalalaryn baılanystyratyn joldardy jóndeýge qarajat qarastyrylsa eken deıdi jergilikti jurtshylyq.

Sondaı-aq Myrzashól óńiriniń turǵyndary aýyl halqynyń turmysyn jaqsartý maqsatynda ázirlenetin «Aýyl – el besigi» arnaıy jobasyn júzege asyrý úshin qarastyrylyp otyrǵan 2019-2021 jyldarǵa arnalǵan 90 mıllıard teńge kó¬lemindegi qarjydan Myrzashól óńiriniń alys aýyldaryn kórkeıtýge de tıisinshe qarajat úlesi bólinýin ótinedi.

Qoryta aıtsaq, Sizden sonaý 1940 jyly qurylyp, 1997 jyly jabylyp qalǵan, Túrkistan oblysynyń buǵan deıingi basshylarynyń tikeleı kinásinen ashylmaı qalǵan Myrzashól óńirindegi Asyqata aýdanyn qaıta qurýyńyzdy suraımyz. Asyqata aýdany qaıta ashylsa, Myrzashól óńirinde jańa jumys oryndary ashylyp, jastarymyz jumyssyzdyqtan arylyp, jergilikti halyqtyń turmys jaǵdaıy jaqsara túser edi.

Myrzashól óńiriniń turǵyndary Ózińizdiń – Elbasymyz Nursultan Ábishuly Nazarbaevtyń halyq úshin jasap jatqan barlyq bastamalaryńyz ben salıqaly saıasatyńyzǵa qoldaý bildire otyryp, osy ótinishti aıaqsyz qaldyrmaı, sheship beresiz dep úmittenedi", - dep jazady Myrzantaı Jaqyp.

Usynǵan: Nazerke Labıhan