Búgin "JAZYLDYM!... Aman bolyńyzdar, aq xalatty abzal jandar! MYŃ ALǴYS!!!" dep jazdy jýrnalıs Beısen Quranbek óz Instagram paraqshasynda. 

"Syrqattanyp aýrýxanaǵa túsken adam bir músápir. Tán syzdaýyna kóńildiń alańy qosylyp, keýdeńdegi úmit pen kúdiktiń, senim men qorqynyshtyń aıqasynyń ortasynda kóziń baqyraıyp, sharasyz kúıde jatasyń. 
Osyndaı kezde qoldaýshyń - bir Alla, tileýshiń - et jaqyndaryń men el-jurtyń, emdeýshiń - dárigerler úsh jaqtap qoltyǵyńnan demeıdi eken.

Ádette, jýrnalıser qaýymy týraly aıtqanda Sher aǵanyń "arqalaǵany - altyn bolǵanymen, jegeni - jantaq" degen sózin jıi keltiremiz. Al dárigerlerdiń arashalaǵany - ómir bolǵanymen, jegeni - kómir eken ǵoı. 

Aýrýxanalardyń qasynan ótkende ne syrtynan kórgende onyń ishinde adam densaýlyǵy men ómiri úshin myltyqsyz maıdan júrip jatqanyn oılaı bermeımiz. 

Bir apta aýrýxanada jatyp, medpersonaldyń jumystaryn kózben kórip, onyń qıyndyǵyn kóńilmen túısingen kezde olardyń jankeshtiligine eriksiz bas ıesiń. 

Máselen, men túsken Almaty qalalyq klınıkalyq 12 aýrýxananyń xırýrgıa bólimshesi 45 tósektik. Onda ádette 75-80 adam jatady eken. Iaǵnı, eki ese kóp. Qyzmetkerler shtaty oǵan eseptelmegen. Biraq, óz jumysyn "jylap" istep júrgen bir adamdy kórmeısiń. Tańnyń atysy, kúnniń batysy quraq ushyp júredi. 

Munda aıyna 300-deı adamǵa ota jasalady. Hırýrgterdiń odan basqa sharýalary tolyp jatyr. Tańǵy jeti bolmaı jumysqa keledi. Ár palatany aralap kóredi. Aýrýlardyń xálderin biledi. Jazylyp qalsa - qýanady. Ózgeris bolmasa - muńaıady. Qaıta em taǵaıyndaıdy. Kúndelikti, lezdeme, konferensıa, konsılýmǵa qatysady. Ota jasaıdy. Qaǵaz toltyrady. Taǵy ota, qaıta qaǵaz toltyrý. Odan qalsa, emdelýshilerdiń jaqyndaryn qabyldaıdy. Kesh batqansha osylaı. Kún ara táýlik boıy túsetin kezekshilik jáne bar. 

Medbıkeler men sanıtarlardyń jumysynyń aýyrlyǵy - ol bólek áńgime. "Jumysym qıyn" degen qyz-kelinshekter olardyń qasynda bir kún júrse ózderi bárin túsinedi.

Al Jan saqtaý bóliminde isteıtinder týraly múlde áńgime joq! Qan maıdannyń alǵy shebi. Ómir úshin arpalysqan aıqas. Mınýt, sekýndtar esepteýli. Zyr júgirip júredi. Aýrýlardyń bárin birdeı qutqarý múmkin emes... Júıkeleri qalaı shydaıdy? Aqylyma syımaıdy!

Osyndaı eńbekteri úshin olarǵa orden, medal bermesek te, alǵys aıtyp júreıikshi.
Aman bolyńyzdar, aq xalatty abzal jandar! 
MYŃ ALǴYS!!!"(orfogr.saqtaldy) dep jazyp, atalmysh aýrýhana qyzmetkerleriniń sýretterin saldy.

Eske sala ketsek, osydan bir apta buryn jýrnalıs Instagram paraqshasyna aýrýhanaǵa jatqan sýretimen birge "Dárigerlerden aınaldym! Sońǵy bir jarym jylda ekinshi ret aman alyp qaldy. Bul joly asqazan jarasy ashylyp, gemoglobın 61-ge túsip ketipti (bárin júrekke jaqyn qabyldaýdyń nátıjesi...). Jan saqtaý bólimindegi jantalastan aman shyqtyq, bastysy. Endi palatada "postelnyı rejımde" raqattanyp jatqan jaı bar?. Sál demalyp, em alyp shyǵaıyn, sosyn, qarbalas tirlikke qaıta kirisem. Tek endi densaýlyqty shyndap qolǵa alý kerek. Áıtpese, aq xalatty abzal jandardan ábden uıat boldy" dep jazba qaldyrǵan edi. Qalyń oqyrmany jýrnalıske shıpa tilep, Alladan járdem suraǵan tilekterin qarsha jaýdyrǵan bolatyn. 

Usynǵan: Maqpal Sembaı