Qyzylorda oblysynda Mı-8 tikushaǵynyń apatqa ushyraýyna baılanysty qylmystyq is qozǵalyp, Bas prokýrordyń baqylaýyna alyndy, dep habarlaıdy Qamshy.kz aqparat agenttigi.

Bul jaıynda búgin Bas prokýrordyń orynbasary Andreı Lýkın málimdedi.

«Bas áskerı prokýratýra qylmystyq isti jiti qadaǵalaıtyn bolady, bul iske qatysty tekserý jumystary júrgizilip, barlyq proses QR Bas prokýratýrasynyń nazarynda bolmaq», - dep aıtty Lýkın.

Onyń málimdeýinshe, qylmystyq is «Ushý erejelerin buzý» baby boıynsha qozǵaldy.

Esterińizge sala keteıik, keshe saǵat 17:30 shamasynda Aqtaýdan Shymkent qalasyna baǵyt alǵan Mı-8 áskerı tikushaǵy Qyzylorda oblysynyń Jalaǵash aýdanynda apatqa ushyrap, órtenip ketken bolatyn. Tikushaq bortynda ekıpaj múshelerin qosqanda 13 adam bolǵan, bári de oqıǵa ornynda opat boldy.

Usynǵan: Nazerke Labıhan