Qazaqstandyq sportshy Shavkat Rahmonov UFC-diń usynysynan ne sebepti bas tartqanyn túsindirdi dep jazady Qamshy.kz aqparat agenttigi vesti.kz saıtynyń deregin negizge alyp. Sondaı-aq Shavkat Rahmonov sporttaǵy sońǵy jańalyqtarǵa qatysty da óz pikirin bildirdi.
— Konordyń aralas jekpe-jekten ketkenin biletin shyǵarsyz. Konor ne sebepti aıaq astynan karerasyn aıaqtady? Qalaı oılaısyz?
— Meniń oıymsha bul Konordyń óz sheshimi. Ol kez kelgen ýaqytta aralas jekpe-jekke qaıta oralýy múmkin. Ózi qalaǵan ýaqytta oktagonǵa shyǵa alady. Qazirgi tabysy óziniń otbasyn tolyq qamtamasyz etýge jetip artylady. Sońǵy málimdemesi kezekti pıar ma, álde shynymen sharshaǵandyqtan sporttan ketti me belgisiz. Ýaqyt kórsetedi.
— Siz ózińizdi kimge kóbirek uqsatasyz? Habıbke me, Konorǵa ma?
— Men Konor da, Habıb te bolmaımyn. Men Qazaqstannyń sportshysy Shavkat Rahmonovpyn.
— UFC-de óner kórsetýińizge ne kedergi?
— Men ózimdi áli de shyńdaýym kerek. Judyryqtasýdy, jekpe-jek kezinde túrli tehnıkalardy úırenýim kerek. Ázirge kóp ýaqytymdy jattyǵýǵa arnaǵym keledi. UFC - eń joǵarǵy deńgeı dep esepteımin.
— Sizdiń salańyzdaǵy eń myqty sportshy dep kimdi aıta alasyz?
— Maǵan Kamar Ýsman unaıdy. Ol óte myqty sportshy. Jartylaı salmaqtaǵy álem chempıony atanǵan.
— Ózińiz aıtqan sportshymen jekpe-jekke shyqqyńyz kele me?
— Men UFC-de óner kórsetken kezde ol oktagonǵa shyǵady ma? Bul jaǵyn ýaqyt kórseter. Múmkin kezdesip qalarmyz. Jekpe-jek bolsa ekeýmiz de túrli deńgeıde óner kórsetetinimiz anyq. Men qoryqpaımyn, biraq mundaı jekpe-jek úshin biraz ýaqyt ter tógý kerek.
— Siz ne sebepti UFC-diń usynysynan bas tarttyńyz?
— Bul usynystyń jasalǵanyna kóp ýaqyt ótken joq. Al 30 naýryzda Almaty qalasynda men jekpe-jekke shyǵýym kerek boldy. Bul jarıalanyp qoıǵan bolatyn. Sondaı-aq M-1 tıtýldyq jekpe-jegin men kópten beri kútip júrgen edim. Sol sebepti bizge usynylǵan bir-eki jekpe-jekten bas tarýymyzǵa týra keldi. Asyǵystyqtyń qajeti joq. Ázirge jekpe-jektiń óz elimde ótkenin qalaımyn.
— M-1 tıtýly — UFC-ge aparar jol ma?
— Bul uıym 20 jyldan beri jumys istep keledi. Álemdegi eń úzdik promoýshenderdiń biri. Bul jerden barlyq sportshy UFC-ge bara alady.
— Aldaǵy jekpe-jek nesimen erekshelenedi?
Bul jekpe-jek óz elimde ótýimen erekshelenedi. Munyń ózi maǵan artylǵan jaýapkershilik dep esepteımin. Azdaǵan qobaljý bar. Men óz jerlesterime úlken syı jasaǵym keledi.
— Jeńiske jetý úshin qandaı tásildi qoldanasyń?
— Qaı tásildiń yńǵaıy keledi sony iske asyrýǵa tyrysamyn. Múmkin nokaýt, múmkin qylǵyndyrý tásilin qoldanarmyn. Tipti jeńiske jetý úshin 5 raýnd qajet bolýy múmkin. (kúldi)
Eske sala ketsek, Rahmonov pen Prıkazoıdyń jekpe-jegi 30 naýryzda "Almaty-Arenada" ótetin bolady.
Aýdarǵan: Ásel Bolatqyzy
