Qazaqstan Respýblıkasynyń Syrtqy ister mınıstri Beıbit Atamqulov Qytaı Halyq Respýblıkasyna resmı saparmen bardy. Sapar barysynda syrtqy saıası vedomstvonyń basshysy QHR Memlekettik keńesiniń múshesi, Syrtqy ister mınıstri Van Imen eki jaqty kelissózder júrgizdi dep jazady Qamshy.kz aqparat agenttigi SİM-niń baspasóz qyzmetine silteme jasap.
Taraptar Qazaqstan-Qytaı saıası, saýda-ekonomıkalyq jáne mádenı-gýmanıtarlyq salalardaǵy yntymaqtastyǵyn odan ári damytýdyń ózekti máselelerin talqylady jáne halyqaralyq kún tártibindegi máselelerdiń keń aýqymy boıynsha pikir almasty.
"Qazaqstandaǵy ishki saıası ózgerister aıasynda B.Atamqulov qytaı tarapyna eldiń syrtqy saıasatynyń ózgermeıtindigi jáne halyqaralyq mindettemelerin oryndaý týraly habardar etti. «Biz jan-jaqty strategıalyq seriktestiktiń jańa kezeńiniń qarym-qatynastaryn nyǵaıtýǵa jáne tereńdetýge degen mindettemelerimizdi rastaımyz", - dedi QR SİM basshysy.
Sonymen birge ol Qazaqstan men Qytaı arasyndaǵy qarym-qatynas ózara utymdy jáne tıimdi yntymaqtastyqtyń úlgisi bolyp tabylatynyn da atap ótti.
Óz kezeginde Qytaı tarapy Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń Qazaqstan-Qytaı jan-jaqty strategıalyq seriktestigin ornatýdaǵy, "Beldeý jáne jol" bastamasyn birlesip qurýdaǵy yntymaqtastyqty tereńdetý boıynsha tarıhı rólin joǵary baǵalady.
Kelissózder barysynda eki el arasyndaǵy óńiraralyq jáne shekara mańyndaǵy seriktestik formattarynda, sondaı-aq ónerkásiptik jáne ınvestısıalyq salada, ekonomıkany sıfrlandyrý jáne tehnologıalyq jańǵyrtý salada praktıkalyq yntymaqtastyqqa erekshe nazar aýdaryldy. "Jibek jolynyń ekonomıkalyq beldeýi" bastamasyn "Nurly jol" Jańa ekonomıkalyq saıasatymen jáne Eýrazıalyq ekonomıkalyq odaqtyń ıntegrasıalyq baǵdarlamalarymen tıimdi ushtastyrýǵa úlken nazar aýdarylady.
Sonymen qatar, Qazaqstan men QHR syrtqy saıası vedomstvolarynyń basshylary BUU, Shanhaı yntymaqtastyq uıymy, Azıadaǵy ózara yqpaldastyq jáne senim sharalary keńesi jáne t.b. halyqaralyq uıymdar jáne ıntegrasıalyq birlestikter aıasyndaǵy yntymaqtastyq, Ortalyq Azıadaǵy turaqtylyq pen qaýipsizdikti qamtamasyz etý máselelerin qarastyryp, transshekaralyq sý resýrstarynyń máseleleri jóninde pikir almasty.
Kelissózderdiń jeke bóligi retinde QHR aýmaǵynda turatyn etnıkalyq qazaqtardyń jaǵdaıy týraly másele boldy. Eki eldiń SİM arasyndaǵy jumys baılanystary arqyly týyndaıtyn máselelerdi sheshýge ózara múddelilik atap ótilip, konsýldyq qyzmetterdiń jumysyn jandandyrý týraly ýaǵdalastyqqa qol jetkizildi.
Kelissózder qorytyndysy boıynsha Qazaqstan men Qytaı syrtqy saıası vedomstvolary arasynda 2020-2022 jyldarǵa arnalǵan Yntymaqtastyq týraly memorandýmǵa qol qoıyldy.
Sol kúni Qazaqstan SİM basshysy QHR Komersıa mınıstri Chjýn Shanmen kelissózder júrgizip, saýda-ekonomıkalyq ózara yqpaldastyq máselelerin talqylady. Qytaı tarapy QR SİM-niń ınvestısıalardy tartý jáne eksportty jyljytýdy úılestirý jónindegi memlekettik saıasatty iske asyrý salasyndaǵy jańa fýnksıalary men ókilettikterimen tanysty.
Qytaı Qazaqstannyń iri syrtqy saýda seriktesi bolyp tabylady. Sońǵy jyldary elderimiz arasyndaǵy saýda kólemi aıtarlyqtaı artty. Osyǵan baılanysty saýda salasyn keńeıtý, saýda qurylymyn ońtaılandyrý, saýda aýqymyn ulǵaıtý, sondaı-aq ekijaqty saýdadaǵy joǵary tehnologıalyq ónimderdiń úlesin arttyrý máselelerin retteıtin Qazaqstan men Qytaı arasyndaǵy saýda qatynastaryn jandandyrý jónindegi Jol kartasyn ázirleý usynyldy.
Sapar aıasynda Mınıstr B. Atamqulov Beıjińniń ortalyq parkindegi qazaq jazýshysy Abaı Qunanbaevtyń eskertkishine gúl shoqtaryn qoıyp, qytaılyq músinshi Iýán Sıkýndi «QR Táýelsizdigine 25 jyl» medalimen marapattaý rásimine qatysty.
Usynǵan: Ásel Bolatqyzy
