"Dos-Muqasan" tobynyń ánshisi Murat Qusaıynov Nur-Sultan áýejaıynda bolǵan oqıǵaǵa qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan saıtynyń deregin negizge alyp. 

Buǵan deıin "Eır Astana" áýe kompanıasynyń baspasóz qyzmeti Murat Qusaıynovty áýejaı qyzmetkerine qol kóterip, densaýlyǵyna zıan keltirdi dep aıyptaǵan edi.

Alaıda áıgili "Dos-Muqasan" tobynyń ánshisi munyń bárin joqqa shyǵaryp otyr.

"Munyń bári – maǵan jasalǵan qıanat. Men "Eır Astanamen" únemi ushamyn, buryn-sońdy mundaı jaǵdaı bolǵan emes. Bári jala", - dedi Qusaıynov.

Onyń aıtýynsha, áýejaı qyzmetkerleri reıs aldynda ánshiden aıaq kıimdi sheshýdi talap etken.

"Áýejaıda kıim sheshtiredi, taǵysyn taǵy. Qalaı tekseretinin bilesizder ǵoı. Men bárin oryndadym. Bir kezde aıaq kıimdi shesh dedi. Men sheshpeımin dedim. Eshqandaı da qylmysker emespin, meni el tanıdy, apta saıyn ushamyz dedim. Skaner bar ǵoı, sonymen tekserińizder dedim. Biraq olar bolmaı qoıdy. Sodan ashýlana bastadym, sózge kelip qaldyq. Biraq, qol jumsaǵan joqpyn. Bul ótirik", - dedi "Dos-Muqasan" tobynyń solısi.

Aıtýynsha, áýejaı qyzmetkerleri ony reıske jibermegen, sóıtip ánshiniń bıleti kúıip ketipti.

"Eır Astana"-men burynnan ushamyn. Bular keıingi kezderi adam syılamaıtyn bolǵan sıaqty. El biledi, halyq tanıdy dep túsindirmek boldym, tyńdamady", - deıdi ánshi.

"Eır Astana" áýe kompanıasynyń baspasóz qyzmeti 14 sáýirde "Nur-Sultan – Almaty" baǵytyna qatynaıtyn KS 852 ushaǵynan tártipke baǵynbaǵan jolaýshy shyǵarylǵanyn habarlady. Olardyń málimetinshe, Murat Qusaıynov áýe kompanıasy qyzmetkerleriniń kózinshe jolaýshylarǵa qyzmet kórsetý bólimi basshysynyń mańdaıyna qatty soqqy jasap, onyń densaýlyǵyna zıan keltirgen.

Osydan keıin áýe kompanıasy Nur-Sultan qalasy áýejaıyndaǵy polısıa bólimine Murat Qusaıynovty jaýapqa tartý jáne sotqa deıingi tergeý júrgizý jóninde aryz túsirgen.