Aqtóbe oblysynda 19 jastaǵy stýdent jumbaq jaǵdaıda qaıtys boldy. Boıjetkenniń múrdesin Badamsha aýylyndaǵy bir úıdiń monshasynan taýypty. Marqumnyń týystary bolsa, qyzymyz ol úıge barmaq túgili, tipti jaqyn aralasqan kórshilerimiz de emes dep otyr. Saraptama keýdesinen tizesine deıin dymy qalmaı kúıip qalǵan qyzdyń ıisten ýlandy dep qorytyndy shyǵarǵan. Alaıda, marqumnyń jaqyndary munymen kelispeıdi. Olar bireýler qylqyndyryp óltirip, sosyn ústine ystyq sý quıǵan dep otyr. Bul týraly Qamshy.kz aqparat agenttigi Eýrazıa birinshi arnasynyń deregine súıenip habarlaıdy.

Juldyzdyń jasy nebári 19-da bolǵan. Otbasyndaǵy úsh balanyń kenjesi ári jalǵyz qyz. Aýylyndaǵy kolejde aspaz mamandyǵyna oqyp júripti. Syrqattanyp júrgen anasyna qolqabys bolsyn dep, sondaǵy dámhanada jumys istegen. 

«Men nkelispeımin, ol degen ólim. Men eshqandaı qyzymdy qıa almaımyn. Ol ózinen ózi baryp bireýdiń monshasyn jaǵa almaıdy. Birinshiden, araq ishpeıdi, temeki tartpaıdy, ol qalaı bireýdiń monshasyna baratynyn aıta almaımyn», - deıdi marqumnyń anasy Kenje Tóleshova.

Oqıǵa Badamsha aýylynda bolǵan. Jaqyndarynyń aıtýynsha, Juldyz túngi saǵat 1-de dámhanadan jumystan shyqqan. Al óli denesin ertesine kúndizgi saǵat 11-lerde tabady. Taýyp alǵan - monshanyń qojaıynynyń uly eken. Ol jerge Juldyzdyń qalaı barǵany, kimmen barǵany jaqyndaryna áli kúnge - jumbaq. 

"Qaryndasymdy bireý shaqyryp alǵan ılı daladan ákelip, ústine ystyq sý quıǵan. Sol sebepti qaıtys bolǵan. Endi zaklúchenıe berip tur, «ýgarnyı gaz» dep. Iesi aıtady, «mende bári jaqsy isteıdi, pechka da durys, «deıstvýıýshaıa baná» dep tur!" - deıdi marqumnyń aǵasy Marat Tóleshov.

«Endi, kúmánimiz bar, ádeıi óltirgen shyǵar... Qylǵyndyrǵan sıaqty, moıynynda bir izder turǵan sıaqty», - dep aıtady marqumnyń jeńgesi Jumagúl Tóleshova.

Qaıǵyly jaǵdaıdan beri 10 kún ótken. Biraq, aǵaıyndary áli kúnge tergeýshilerden mardymdy jaýap ala almaı júrmiz deıdi. İstiń túsiniksiz tustary kóp ekenni aıtady. 

"Maǵan qońyraý shalyp júregi toqtap qaldy dedi. Endi myna qaǵazda gazben ýlandy dedi", - dep aıtty Kenje Tóleshova.

Ádildik izdegen Tóleshovter prokýrorlarǵa shaǵymdanbasqa amalymyz qalmady dep otyr. Óıtkeni, tergeýshiler istiń mán-jaıymen tanystyrmaq túgili, qylmystyq istiń qaı bappen qozǵalǵanyn da aıtpapty. 

"Jazbasha aryzdy biz qabyldadyq, tıisti tártippen tirkeledi. Sosyn, zańda bekitilgen merzimde aryz qaralyp, qylmystyq is mindetti túrde zertteledi", - dep málimdedi oblystyq prokýratýra tergeý basqarmasynyń basshysy Tımýr Qydyralın.

Juldyzdyń jaqyndary onyń aqjarqyn, pysyq, oǵash qylyǵy joq, erke bolǵanyn aıtady. Kolejdi aıaqtap, dıplomyn alýyna da nebári sanaýly ýaqyt qalǵan eken. 

Marqumnyń jaqyndary boıjetken ıisten ýlanyp óldi degenge múldem senbeıdi. Sot-medısınalyq saraptamasynyń qorytyndysyna da kúmánmen qarap otyr. Sondyqtan, máıitke eksgýmasıa jasaýǵa aryzdanyp qoıǵan.

Usynǵan: Nazerke Labıhan