Kım Chen Yn men Pýtınniń kelissózderi Vladıvostok qalasynda aıaqtaldy dep jazady Qamshy.kz aqparat agenttigi sheteldik BAQ-tyń deregin negizge alyp. Kelissóz júrgizý barysynda reseılik BAQ Soltústik Koreıa basshynyń birtúrli qylyqtaryn jazyp, talqylap jatyr.
Kım Chen Yn tek qana óziniń lımýzınimen ǵana júredi, tipti ájethanaǵa da barmaıdy sebebi lımýzınniń ishinde bıologıalyq ájethana bar eken. Sondaı-aq qatal basshy óziniń stılin qaıtalaýǵa da tyıym salǵan kórinedi.
Álemdik jáne reseılik BAQ ókilderi Vladıvostok qalasynda qyzyqty jaıttyń kýási boldy. Kım Chen Ynnyń kúzetshileri kezdesýden buryn Kım Chen Ynnyń oryndyǵyn maılyqpen súrtken. Vıdeony túsirgen avtor maılyqtyń spırtke shylanǵanyn jáne kúzetshiler dızınfeksıa jasaǵanyn aıtqan.
Sondaı-aq 2015 jyly Kım Chen Yn Soltústik Koreıa sheneýnikterine óziniń stılin qaıtalaýǵa tyıym salǵan bolatyn. Bul zań shyqpaı turyp Soltústik Koreıa turǵyndary kóshbasshynyń stıline qyzyǵýshylyq tanytyp, sondaı stılde kıingen edi.
Soltústik Koreıanyń basshysy shetelge issaparmen kóp shyǵa bermeıdi. Tipti shyqqan kúnniń ózinde óziniń jeke transportymen júredi. Reseıge sapary barysynda da Kım Chen Yn óziniń jeke lımýzınimen júrgen. Onyń jeke lımýzınin aldyrýdyń ózi ońaı bolmaǵan. Vladıvostok qalasynyń temir jolynda Soltústik Koreıa basshynyń lımýzıni syımaǵan soń, 20 santımetrlik qabyrǵany alyp tastaýǵa týra keldi.
Al ǵajap kóliktiń ishinde bıologıalyq ájethana bar. Bul ne úshin? Bul da qaýipsizdiktiń belgisi. Kım Chen Yn nájisiniń ózin qarsylasynan qyzǵyshtaı qorǵaıdy. Kım Chen Ynnyń qarsylastary onyń nájisi arqyly onyń qandaı aýrýmen aýyratynyn, densaýlyǵy qandaı ekenin bilip qoıýy múmkin. Sol sebepti Soltústik Koreıa basshysy kez kelgen qaýiptiń aldyn alady. Tipti soltústik koreıalyqtar Kım Chen Ynnyń ájethanaǵa múldem barmaıtynyna ımandaı senedi eken.
Soltústik Koreıa basshynyń jan-jaǵynda torýyldap júrgen kúzetshilerge qatań tártip qoıylatyny belgili. Bir qyzyǵy, olar fızıkalyq turǵydan myqty bolýy qajet jáne de boılary Kım Chen Ynnan uzyn bolmaýy shart. Al Soltústik Koreıa basshynyń boıy shamamen 163 sm eken.
Aýdarǵan: Ásel Bolatqyzy
