Talǵat Erǵalıev «Aq jol» partıasynyń biraýyzdan saılanǵan kandıdaty Danıa Espaevaǵa qoldaý bildirip, óziniń prezıdenttik saılaýǵa qatysý týraly ótinishin qaıtaryp aldy dep jazady Qamshy.kz aqparat agenttigi "Aq jol" QDP baspasóz qyzmetiniń deregin negizge alyp.
"Aq jol" demokratıalyq partıasynyń tóraǵasy Azat Perýashev Qazaqstannyń Qurylysshylar odaǵynyń atynan prezıdenttikke kandıdat retinde ózin usyný týraly ótinish berý málimdemesine baılanysty partıanyń múshesi Talǵat Erǵalıevpen kezdesti. Belgili bolǵandaı, jýyrda ǵana ótken partıanyń sezinde alty úmitker boıynsha qupıa saılaý ótken bolatyn. Onda Qurylysshylar odaǵynyń jetekshisi 31,6% daýysqa ıe bolyp, ekinshi oryn alǵan.
Azat Perýashev óz kandıdatýrasyn usynǵan kez-kelgen azamat sekildi Talǵat Erǵalıevtiń quqyǵyna da qurmetpen qaraıtynyn túsindirdi. Onyń ústine, mundaı qadam jasaýyna túrtki bolǵany onyń partıalyq daýys berý kezinde joǵary nátıjege qol jetkizgeni ekeni onsyz da túsinikti. Alaıda, ol "praımerızdiń" alty qatysýshylaryna partıanyń biraýyzdan saılanǵan úmitkeri Danıa Espaevanyń komandasyna qosylý týraly quryltaıdyń sheshimi jóninde eske salyp ótti.
Óz kezeginde, T. Erǵalıev sıeziń saılaý qorytyndysyna qatysty eshbir mini joq ekenin habarlady. Ol QR Qurylysshylar odaǵynyń atynan úmitkerlikke ózin usynýyn durys dep sanaıdy. Óıtkeni, bul uıymdy burynnan basqaryp kele jatqandyqtan, atalmysh saladaǵy ótkir máselelerdi jáne turǵyndardyń qoljetimdi baspanaǵa degen muqtajdyǵyn egjeı-tegjeıli biledi. Bul túıtkildi máselelerge memlekettik deńgeıde tıisti nazar aýdarylyp jatqan joq dep paıymdaıdy.
Sondaı-aq, ol bir ǵana partıanyń atynan birden úsh partıa múshesiniń ár túrli qoǵamdyq birlestikterdiń atynan saılaýǵa kandıdattyqqa usynylǵany jóninde mysaldar keltirip ótti.
Soǵan qaramastan, «Aq jol» partıasyna degen óziniń syı-qurmetin bildirip, partıa tóraǵasymen áńgimeleskennen keıin Talǵat Erǵalıev Ortalyq saılaý komısıasynan óziniń ótinishin qaıtaryp alýǵa nıetti ekenin jáne Danıa Espaevanyń saılaýaldy naýqanyna qatysýǵa ázir ekenin málimdedi.
Azat Perýashev QR Qurylysshylar odaǵynyń tóraǵasyna tilektestigi men er-azamatqa tán áreketi úshin óz alǵysyn bildirdi.
Usynǵan: Ásel Bolatqyzy
