Mádenıet jáne sport mınıstrligi «Qazaqkonsert» memlekettik konserttik uıymynyń dırektory Jeńis Seıdýllaulynyń buıryǵymen Móldir Áýelbekova shyǵarmashylyq qyzmettiń basshysy bolyp taǵaıyndaldy. Bul týraly Mádenıet jáne sport mınıstrliginiń baspasóz hatshysy Aıdar Qyryqbaı feısbýk paraqshasynda málim etti.
«Estrada, klasıka, fólklor, teatr baǵytyndaǵy elimizdiń úzdik shyǵarmashylyq ujymdaryn bir arnaǵa toǵystyryp, qazaq óneriniń qarashańyraǵyna aınalǵan «Qazaqkonserttiń» shyǵarmashylyq qyzmetine endi Móldir Áýelbekova basshylyq jasaıdy.
Budan buryn ol «Qazaqkonserttiń estradalyq toptaryna jetekshilik etip, shyǵarmashylyq izdenisterinde jańa ıdeıalar men tyń bastamalarǵa beıim ekendigin kórsetti. T. Júrgenov atyndaǵy Qazaq Ulttyq óner akademıasynyń túlegi 2011 jyly estradalyq óner magıstri atanǵan. ​ ​
Móldir Esirkepqyzynyń shyǵarmashylyq joly talant, kásibılik sheberlik, tynymsyz eńbek nátıjesinde bıik belesterdi baǵyndyrýǵa bolatynyn dáleldeıdi. Respýblıkalyq jáne halyqaralyq baıqaýlardyń laýreaty, tanymal ánshi, aktrısa ári jas prodúser retinde Móldir Áýelbekova qazaq estrada óneriniń damýyna eleýli úles qosýda. ​ ​
Mádenıet jáne óner salasyndaǵy joǵary jetistikteri úshin 2018 jyly «Qurmet» ordeniniń ıegeri atandy. ​ ​
Elimizdiń mádenı keńistiginde ózindik orny bar kásibı óner ıesi retinde Móldir Áýelbekova jańa qyzmette abyroı bıiginen kórinip, shyǵarmashylyq salada bıik asýlardy baǵyndyratynyna senemiz».