Óz eńbegimen baılyq jınaǵan mıllıonerlerdiń kópshiligi tabandy eńbek etedi. Tipti jumys isteý qarqyny keshegige qaraǵanda búgin eselene túsýi múmkin. Keńsege jumys ýaqytynan erte kelip, ózgelerge qaraǵanda kóbirek eńbek etip, jumys sońynda qaıtýdy ádetke aınaldyrady. Olar óz salasyndaǵy eńbekqorlar sanatyna jatatyn adamdardyń arasynda úlken bedelge ıe. Bul jaǵdaı bárine jaqsy tanys.
Óz tájirıbeńizde «40+» formýlasyn qoldanyp kórińiz. Bul formýla boıynsha bir aptada 40 saǵat «ómir súrý úshin» jumys isteısiz, al 40 saǵattan tys ýaqytty – tabysqa jetý úshin jumsaısyz. Eger siz 40 saǵattan jumys isteıtin bolsańyz (búginde jumys aptasynyń ortasha uzaqtyǵy – 35 saǵat), onda tek ómir súrip júrgen bolasyz. Sol sebepti eshqashan alǵa jyljı almaısyz. Úlken qarjylyq tabysqa jetem degen oıyńyz da qur áýreshilik bolyp qalady. Áriptesterińiz de sizdi syılap, joǵary baǵalamaıdy. Aptasyna tıisti qyryq saǵattyq jumyspen shektelseńiz, talantyńyzdy shyńdaýyńyz da ekitalaı.
Esesine 40 saǵattan tys ýaqytty sizdiń bolashaǵyńyzǵa salǵan ınvestısıańyz dep esepteýge bolady. Eger siz ár aptada qyryq saǵattan tys ýaqytyńyzdy qanshalyqty jumysqa arnaıtynyńyzdy baqylasańyz, onda 5 jyldan keıin qaıda bolatynyńyzdy ózińiz-aq asa dáldikpen boljaı alasyz.
Taza óz eńbegimen aqsha taýyp júrgen amerıkalyq mıllıonerler aptasyna 59 saǵat jumys isteıdi. Kópshiliginde, bul kórsetkish 70 nemese 80 saǵatqa jetýi múmkin. Ásirese kásipkerlik mansabynyń alǵashqy kezderinde bul kórsetkishtiń deńgeıi arta túsedi. Olar, ortasha eseppen, aptasyna 5 kún emes, alty kún eńbektenedi. Ári olardyń jumys kúnderi tym uzaq. Eger siz mıllıonermen sóıleskińiz kelse, onda oǵan jumys ýaqyty bastalar kezde nemese jumys ýaqyty biter kezde habarlasyńyz. Ózi aqsha taýyp, baıyǵan mıllıoner, saǵat toǵyzdan beske deıin jumys isteıtin qatardaǵy qyzmetkerler endi jumysqa kelip jatqan kezde, jumys ústeliniń basynda otyrady. Jáne de jumys ýaqyty bitip, barlyǵy úıdi-úıine tarqasqan kezde de sol jerden tabylady.
«Jumys ornynda otyrǵan ýaqyttyń barlyǵynda tek qana jumys isteńiz» degen jaqsy oı aıtylady. Jumys istep otyryp, ýaqytyńyzdy tıimsiz nárselerge jumsamańyz. Tańerteń keńsege kirgen boıda jumys ústelińizge otyryp, aldyńyzda jatqan qaǵazdarǵa úńilip, birden jumys isteýdi bastap ketińiz. Eger áriptesterińiz sizdiń oıyńyzdy bólip, áńgimelesýge shaqyrsa, keshirim ótinip: «Meni jumys kútip tur!», - deńiz.
Bul úı sharýasymen aınalysýdy, dostaryńa habarlasýdy, áriptesterińmen sóılesýdi nemese gazet oqýdy doǵarý kerek degen sóz emes. Alaıda jumys ýaqytynda, mindetti túrde jumys isteńiz. Búginnen bastap fırmańyzda bárinen de qarqyndy ári kóp jumys isteıtin adamnyń bedeline jetý úshin aldyńyzǵa maqsat qoıyńyz. Ol óz kezeginde sizge kómek qolyn sozýǵa daıyn adamdardyń sanyn arttyrady.
Avtory: Braıan Treısı
«Mıllıonerlerdiń 21 qupıasy»
Aýdarǵan: Marjan Sábet
