Almatyda kópirge Konstıtýsıadaǵy sózder jazylǵan plakatty ilgen sýretshi Roman Zaharov bosatyldy dep habarlaıdy Qamshy.kz aqparat agenttigi  Tengrinews.kz saıtyna silteme jasap.

Onyń jazasy bes kúndik ákimshilik qamaý túrindegi jaza aıyppulǵa aýystyryldy.

"29 sáýirde Almaty qalalyq sotynyń apelásıalyq alqasy Mamandandyrylǵan aýdanaralyq ákimshilik sottyń Roman Zaharovqa qatysty shyǵarǵan úkimin qarady. Apelásıalyq alqadaǵylar osyǵan deıin bes kúndik ákimshilik qamaý túrindegi jazany ákimshilik aıyppulǵa ózgertti. Roman Zaharov Ákimshilik quqyq buzýshylyq týraly kodekstiń 434-babynyń 1-bóligi boıynsha 5 AEK kóleminde (12 625 teńge) aıyppul tóleýge mindetteldi. Sot úkimi zańdy kúshine endi", - dep habarlady sottaǵylar.

Osyǵan deıin áleýmettik jelilerde Konstıtýsıadaǵy sózder keltirilgen plakattyń sýretteri taralǵan bolatyn. Plakattyń avtory Roman Zaharov ekeni anyqtalǵan edi. Keıinirek polısıadaǵylar oqıǵanyń mán-jaıyn aıtyp bergen edi. 

"Tańǵy saǵat 6-da Jedel basqarma ortalyǵyna turǵyndar habarlasyp, ál-Farabı dańǵyly men Dostyq kóshesiniń qıylysynda belgisiz er adamnyń qaǵazdar jáne taǵy basqa zattardy laqtyryp júrgeni jaıly habarlady. Jol-patrýldik polısıa qyzmetkerleri oqıǵa ornyna bardy. Er adam ózin ersi ustap, quqyq buzýyn toqtatpady. Onyń aty-jónin anyqtaý úshin polısıa jasaǵy er adamdy Medeý aýdandyq polısıa basqarmasyna jetkizdi", - dep habarlaǵan edi polısıadaǵylar

Usynǵan: Maqpal Sembaı