Adam ómirge kelgen sátten bastap, barlyq ómiri peshenesine jazylyp qoıatyny belgili. Mine, musylmandardyń eń úlken abyroıy da osy. Biz sony túsingenbiz. Neshe jyl, neshe kún ómir súretinimizdi bilmeımiz, biraq barlyǵy da bir Allanyń qolynda ekenin bilemiz. 

Syn saǵatta synalyp, kúrt jaǵdaı nasharlap, densaýlyq syr berip, otbasynyń shyrqy buzylyp jatqan jandar qanshama. Osyndaı jaǵdaıda eri áıelin, áıeli erin tastap ketip jatqan jaǵdaılar da az emes.

Qysqasha mysal: Otbasy. Kúıeýiniń jumysy keremet, áıeli úıinde úsh balaǵa bas-kóz bolyp otyratyn. Nekelesken kúnnen bastap qaıǵy-qasiret kórmegen januıa edi. Bir kúni qymbat kólikti tizgindegen otaǵasy jol ústinde erkelik tanytyp apatqa tústi. Hali aýyr bolyp, sońynda tósekten turýǵa bolmaıtyn dıagnozben alty aı jatty. Bir qyzyǵy, alty aıdan keıin ol adamda ne áıel, ne bala-shaǵa bolmady. Tósek tartyp qalǵan kúnnen eki aıdan keıin  "múgedek boldy, endi saýyqpaıtyn shyǵar",- dep zattaryn jınap ketip qalǵan. Ary qaraı oqıǵa kitap jelisindegideı óte qaıǵyly boldy. Bul jerde Alla Taǵala birden synaqty otbasyna saldy. Eriniń densaýlyǵyn, jigerin synasa, jarynyń sabyr men sezimin synaǵan bolatyn.

Alla Taǵala súıgen qulyn kóp synaıdy, ol týraly:

"Keıde bir qorqynysh-úreı tóndirý, tarshylyq jasaý, mal-jandaryńa kemshilik keltirý, ónimderińdi azaıtý arqyly Biz senderdi synǵa alamyz. Osyndaı taýqymet kelgen shaqta: "Biz Allanyń pendesimiz jáne onyń aldyna qaıtyp, baramyz",–dep sabyr saqtaýshylardy (eı, Muhammed!) sen qýandyr. Allanyń raqymy men yqylasyna laıyqty jandar – solar, týra joldan aýmaıtyndar da solar" (Baqara súresi, 155-157 aıattar),- degen Quranda.

Kóp synǵa alynýshylar – kúnási keshiriletinder. Jan balasy basyna qıyndyqqa kelgen kezde, tómenge qaraı  emes, joǵary qaraı órmeleýi tıis. Allaǵa degen madaǵyn, zikirin arttyrýy qajet.

Allanyń Elshisi (s.ǵ.s): "Alla kimge jaqsylyq qalasa, ony synaıdy",-degen. Bálkı, Jaratýshy sizdiń ony ulyqtaǵanyńyzdy, kóp eske alǵanyńyzdy, jalbarynǵanyńyzdy, qol jaıyp dármensiz pende ekenińizdi moıyndap, ımanyńyz berik bolýyn qalaıdy. Túbinde osy úshin sizdi Jánnátpen mártebeler.

Paıǵambarymyz (s.ǵ.s): "Múminniń isteri ǵajap, onyń istegen isteriniń barlyǵy qaıyrly. Bul nárse tek múminge ǵana berilgen. Eger qýanyshqa bólense, shúkir etedi, ol oǵan jaqsy. Eger basyna qıynshylyq tússe sabyr etedi, ol da oǵan jaqsy",- degen bolatyn. Sabyr – barlyq jaqsylyqtyń kilti. Basqa túsken náýbetke sabyr qylǵan pendeniń saýaby mol.

Endeshe kelgen synaqty kúlip qarsy alyp, sabyrmen shyǵaryp salǵan Allanyń qulynan qaıyrly eshkim joq. Aýzynan duǵasy, qolynan Qurany túspegen jannyń bári de synalmaq. Alla Taǵala árkimge ár túrli synaq jiberedi. Paıǵambarymyz (s.ǵ.s) múbárak hadısinde bylaı deıdi:

"Adamdardyń eń qatty synalatyndary – paıǵambarlar, keıin árkim dárejesine saı synaqqa alynady...Pende jer betinde kúnásiz júrmeıinshe synaqqa alyna beredi»

Ǵalymdar bylaı deıdi: "Paıǵambarlarǵa berilgen synaq-kúnálaryn keshirý nemese jazasyn berý emes, bálkim, saýaby eselenip, sabyrlyqtary júzege asý úshin synaqqa alynady".

Alla Taǵala bylaı deıdi: "Adamdar: "Sendik" deýmen synalmaı qoıylatyndyqtaryn oılaı ma? Ras, olardan burynǵylardy da synaǵan edik. Sondaı-aq Alla, álbette, shynshyldardy da biledi, ótirikshilerdi de biledi". Árıne, Alla shynshyl múminderdi basqalarynan aıyrý úshin, kim sabyrly, kim sabyrsyz ekenin bildirý úshin synaq beredi. Anyqtap aıtar bolsaq, ekijúzdiler Jaratýshynyń bergen aýyr synaqtaryna sabyrlyq etpeı, onyń qaıyry bolaryn umytyp "Sendik" degen sózinen tansa, al kámil musylmandar ondaıda ózin jaqsy kóretin Jaratýshysyna ıman keltirip, sabyrlyq tanytpaq.

Basyńa tússe kónesiń,

Osy kúnińe shúkirlik.

Synaqtar kelse kóresiń,

Allany maqta, zikir qyp.

Bek Baıtas

Qasıetti Ramazan aıynyń aıaqtalýyna bir ǵana kún qaldy. Qamshy.kz aqparat agenttigi "osy aıda tilegen duǵa-tilekterińiz, jasaǵan qulshylyqtaryńyz qabyl bolsyn! Fánıde sabyr tanytyp, baqıda saýap jınańyz! Barshamyzdan Alla razy bolsyn!" dep tilek bildiredi.