Oblys ákimi Alık Aıdarbaev jınalǵandardy alqaly jıynnyń ashylýymen quttyqtap, óńi­rimizdiń Qazaqstan ekonomıkasynyń damýyna eleýli úles qosyp, qarqynmen alǵa jyljyp kele jatqanyn aıtty. «Búgingi basqosýdyń bizdiń aımaǵymyzda ótýi de jaıdan-jaı emes, oblysymyzǵa degen úlken senim ekeni anyq. Aýqymdy sharanyń qurylys pen turǵyn úı-kommýnaldyq sharýashylyǵy salasyn jandandyrý, jańa  tehnologıalardy engizý jáne ozyq tájirıbelermen almasý taqyrybyn alýy da ózektilikten týyp otyr»,- dedi aımaq basshysy. Aqtaý qalasy boıynsha aldaǵy  josparlar men ja­salyp jatqan ju­mys­tar jaıynda qala ákimi Edil Jańbyrshın baıandady: «Basqa qalalar sıaq­ty Aqtaý da damýdyń stra­te­gıalyq jospary bo­ıynsha alǵa basý ústinde. Qala­ny órkendetý búginde 4 ba­sym­dyq: áleýmettik sala, halyq­aralyq jáne ekono­mıkalyq baılanystar, ın­f­ra­qury­lym jáne jergi­likti memlekettik basqarý júıesin damytý baǵytynda júrgiziledi. Al, turǵyn úı-kommýnaldyq sha­rýashylyǵy salasynda  jáne  qoǵamdyq kólikterdiń  jolaýshy tasymalyna baılanysty sheshimin tappaǵan máseleler jeterlik. Sondaı-aq, turǵyndardy, ásirese, áleý­mettik jaǵynan az qamtylǵan jandardy baspanamen tolyqtaı qamtamasyz etý de ońaı bolmaı tur». Mamandardyń aıtýynsha, turǵyn úı-kommýnaldyq sha­rýashylyǵy salasy eki negizgi tetikpen tyǵyz baılanysty, bul – turǵyn úı sektory jáne turǵyndarǵa  komýnaldyq qyzmet kórsetýdi  qamtamasyz etý bolyp bólinedi. Aqtaýdyń komýnaldyq ınfraqurylymynyń júıesi memlekettiń qa­daǵalaýyndaǵy birneshe monopolıs mekemelerge shoǵyr­landyrylǵan. Búginde ózektige aınalǵan másele – bul turǵyn úılerdiń eskirýi, shatyrdan sý aǵý jáne jertólelerdi sý alý, toq júıeleriniń tozýy, jylý júıesi turbalarynyń bitelip qalý  oqıǵalarynyń  jıileýi bolyp otyr. Bizdiń qalamyzda 850  kóp páterli turǵyn úı bolsa, olardyń alǵashqylary 60-70 jyldary tur­ǵyzylǵan. Keıbir úıler qyryq jylda bir jón­deý kórmegen kórinedi. Osy oraıda, konferensıa qatysýshylarynyń biri Novosibir qalasynyń meri Anatolıı Lokot: «Turǵyn úı-kommýnaldyq  má­seleler  bar­lyq  qalalar úshin birdeı deýge bolady. Tek sheshilý joldary men múmkindikter basqasha, árkim óz qolynan kelgenshe, qarjysy jetkenshe  jumys isteýde. Novosibir qalasy  qazir qarqyndy damý jolyna túsken. Aqtaý qalasy ákimdigimen birlesip jumys isteýge qushtarmyz. Biz kórshimiz, ári basqa da ortaq nárseler jeterlik» dep, yntymaqtasa jumys is­teýge ynta tanytty. Budan soń baıandama jasaǵan jıyn qatysýshylary turǵyn úı-kommýnaldyq sharýashylyǵyn je­til­dirý  boıynsha máselelerdiń az emes  ekenin aıtyp, onyń  she­shimin  birge  izdeýdiń jáne tájirıbe al­masýdyń ma­ńyzdylyǵyn atap ótti. Májilis barysynda oblys ákimi Alık Aıdarbaev halyqaralyq reıtıńilik  «Sala kóshbasshysy – 2015» baı­qaýynyń qorytyndysy boıynsha úzdik dep ta­nylǵan Aq­taý qalasy ákimdiginiń  «Qala joldary» bóli­mi­niń bas­shy­syn jáne birneshe qyzmetkerin marapattap, sertıfıkat tapsyrdy. Jıyn sońynda Aqtaý qalasynyń ákimi Edil Jań­byrshın men  Reseı Federasıasy Qalmaq Respýb­lıkasy astanasy Elısta qalasynyń basshysy Vácheslav Namrýev qos qalanyń arasynda baýyrlastyq baılanysty bekitetin kelisimge qol qoıdy. Budan soń qonaqtar Aqtaýdaǵy óndiris oryndaryn aralap, óńirmen tanysty.