«Ótken jyly  porttyń  júk tasymaldaý qýattylyǵy artyp,  jospar  artyǵymen  oryndaldy.  Naqtyraq aıtsaq, portta 10,3  mln.tonna  qurǵaq júk tıeldi. Onyń ishinde  qurǵaq  jáne munaı tıelgen júkter -  5,954 myń tonna, metal ónimderi- 1,229 myń tonna, paromdy júkter – 19,966 myń tonna, astyq- 686 myń tonna jáne ózge 433 myń tonna júk tasymaldandy. Kemeler Aqtaý portyna 1640 ret, Baýtın portyna 1273 ret kirdi. Qarjylyq kórsetkishterge  kelsek, aksıonerlik qoǵamnyń 2014 jyldaǵy jalpy kirisi 11,4 mlrd.teńgeni quraıdy. Salyq jáne ózge tólemderden aýysqan qarjy  porttyń óndiristik múmkindigin keńeıtýge, áleýetin arttyrýǵa, ınvestısıalyq baǵdarlamalardy júzege asyrýǵa baǵyttaldy. Teńiz portynda kórsetiletin qyzmetterge jańa tarıfter men tarıftik smeta arnaıy bekitilgen qaýly boıynsha qalyptasqan.Qazirgi ýaqytta portta sapa, ekologıa menedjmenti halyqaralyq standarttarǵa sáıkes, kásibı qaýipsizdik jáne eńbekti qorǵaý júıesin engizý jolǵa qoıyldy» degen tarıf saıasaty bólimi basshysynyń mindetin atqarýshy M.Lomakına jumys  júıesin jeńildetý úshin avtomattandyrylǵan júıe qoldanysqa engizilgenin habarlady. Onyń aıtýynsha, arnaıy  qyzmet kórsetý  «bir tereze» boıynsha júzege asyrylyp, tutynýshylar qajetti qujattaryn rásimdeýde ýaqytyn únemdeı alady. Jıynda sóz alǵan «AHTSP» UK» AQ  ekonomıka jáne qarjy jónindegi vıse-prezıdenti A.Jangaskanov Aqtaý porty  múm­kindigi men qaýqary  ózge kórshiles memleketterdegi kólik dálizimen salystyrǵanda básekelestik qabilettiligi joǵary ekendigin atap ótti. Onyń sózine sensek, porttyń aldaǵy damý baǵytynda tehnıkalyq qural- jabdyqtardy jańǵyrtý jumysy jalǵasyn tabady. Qoǵamdyq tyńdaýǵa qatysqan ártúrli kompanıa ókilderiniń tarapynan qoıylǵan suraqtarǵa mamandar jaýap berdi. Qazirgi tańda Aqtaý teńiz porty arqyly Iran, Reseı, Ázirbaıjan memleketterine  munaı, astyq, túrli metaldar jáne ózge de tranzıttik júkter lek-legimen tasymaldanýda. Sondaı-aq «Baký-Aqtaý-Baký» paromdyq jelisi úzilissiz jumys jasap tur.