Dál qazirgi qalyptasqan bılik fabrıkasynyń bıik dálizinde júrgender men kezinde joǵarǵy ettalondar qatarynda bolyp, túrli sebeptermen syzylyp qalǵandar týraly toptamanyń kelesi keıipkeri – Aslan Mýsın.
Bir kezderi túkirigi jerge túspegen Aslam Mýsın qazir qaıda júr? Jurt aýzyndaǵy «Mýsın shetelge qashyp ketipti» nemese «Mýsın Germanıada em alyp júr eken, densaýlyǵy syr beripti» degen syńarjaq qaýesetter qanshalyqty shyndyqqa janasady? Qazirgi Nazarbaev qalyptastyrǵan basqarýshy júıe bir kezdegi óziniń saqalarynyń ishindegi adýyndysyn nelikten kereksiz etti? Sonda, Aslan Mýsınniń saıasattaǵy róli shahmat taqtasyndaǵy «peshka» sekildi bolǵany ma?
Esterińizde bolsa, Aslan Mýsınniń tikeleı qaramaǵynda, qorǵanynda bolǵan Atyraý oblysynyń eks-ákimi Bergeı Rysqalıevti Prezıdent ornynan alyp tastaǵanda Mýsınge qatysty túrli saıası boljamdar jasalǵan. Sol kezdegi Esep komıtetiniń tóraǵasy laýazymynan bostylǵan Aslan Mýsın Eýropaǵa qashyp ketipti, endi kelmeıtin sekildi degen sybystar keýlegeni týraly qazaqstandyq BAQ az jazbady (http://shyn.kz/article/view?id=44). Tipti, keıbir aqparat kózderiniń aıtýynsha, Aslan Mýsın ózine shyn berilgen adamdardyń barlyǵyna shetelge qashýǵa keńes bergen-mys. Eks-májilis depýtaty Amanjan Rysqalıev tutqyndalǵan soń, Mýsınniń basyna qara bult úıirile bastaǵanyn sol kezde ózi de sezse kerek-ti.
«Respýblıka» basylymnyń jazýyna qaraǵanda Aslan Mýsın qazir sheteldegi qashyp júrgen ózge de qazaqstandyq saıası emıgranttarmen kelissózder júrgizýge talpynyp jatqan kórinedi. Ásirese, Muhtar Áblázovtyń kóńilin taýyp, onymen birlesip Aqordaǵa qarsy kompromattar jarıalamaqshy eken.
Sonymen, joǵarydaǵy aıtylǵandardan uqqanymyz, Mýsın Rysqalıevterdiń kesirinen oıynnan shyǵyp qalyp, sheteldegi bılik oponentterimen aýyz jalasa bastaǵan-mys.
Al resmı organdaǵylar bolsa, Azattyq saıtyna bergen aqparatynda «Esep komıtetiniń Tóraǵasy Aslan Mýsın aǵymdaǵy jyldyń qazan aıynyń sońyna deıin kezekti jyl saıynǵy eńbek demalysynda bolady, qazirgi ýaqytta ol Germanıada dárigerlik tekserýden ótýde», - delingen (http://azh.kz/kz/news/view/4092 ). 2012 jyldyń aqparatynda komıtettiń apparat jetekshisi Vıktor Sýprýn Aslan Mýsınniń prezıdent ákimshiliginiń kelisimi boıynsha demalysta ekenin, «Respýblıka» saıtynda jarıalanǵan «onyń qashýyna» qatysty málimet shyndyqqa janaspaıtynyn jetkizgen. Sonymen opozısıalyq BAQ-tar jazǵan Mýsınniń shetel asyp ketkendigi jalǵan bolyp shyqqany ma?
Iá, Mýsındi qashty deý jalǵan bolǵanymen, shetel asqany shyndyq. Dáýirinde dúrkirep turǵan, túkirigin jerge túsirmeıtin senimdi qalqandary men qolshoqparlary bar, QR Prezıdent apparytyn basqarǵan, QR Esep komıtetin urshyqtaı ıirgen Aslan Mýsın qazir qarapaıym elshi ǵana.
Bir kezderi Mýsınniń susynan seskenbeıtinder az edi aý... Aǵaıyndy Rysqalıevterge qalqan bolamyn dep júrip, opyq jegen Mýsın jýyq arada elge oralýy múmkin degen sybys bar. Iá, Ákejan Qajygeldın men Aslan Mýsınniń úlken saıasattaǵy sońǵy júristeri bul emes- aý... Aıtapqshy bir kezderi Prezıdenttiń qaharyna ushyraǵandarǵa bıyldan bastap raqymshylyq jasalyp, kól asaǵan kóp sheneýniktiń qaıta bostandyqqa jiberilýinde de bir gáp bolsa kerek. Sondaı bir raqymshylyqqa ilinip, Aslan Mýsın qaıta eńse tiktese bıliktiń aýa-raıy qalaı qubylar eken?
Nurgeldi Ábdiǵanıuly
