Arnur Dúıshembıeva, turyp jatqan jalǵyz úıin oırandap jatqan soń keshe tańerteń qalalyq turǵyn úı basqarmasyna kelgen eken. Alaıda arasha túsedi degen basshy aryzyn tyńdamaq túgili, ózine tarpa bas salypty. Bul týraly «Qamshy» portaly «31» arnaǵa silteme jasaı otyryp  habarlaıdy. Sheneýnik bolsa, kelinshektiń ózi birinshi bolyp qol jumsady dep otyr.

       “Men shendige úıdi nege buzǵyzyp jatyrsyń, astynda 4 balamen qalamyn desem, “qalsań qala ber, zańsyz turyp jatyrsyń” deıdi. Osynda 9 jyl turyp jatyrmyn, endi men qaıda baramyn desem “qaıda barsań onda bar, úıindiniń astynda qal”. Biz kináli emespiz dep”, – jaýap qatty deıdi kóp balaly ana Arnur Dúıshembıeva.

        Al, “Qalalyq jyljymaıtyn múlik” mekemesiniń dırektory, ózi qol jumsamaǵanyn, aıqaı-shý shyǵarǵan kelinshekti kerisinshe tynyshtaldyr dep hatshy qyzǵa buıyrǵanyn aıtady.

      Strochkovtyń aıtýynsha, Dúıshembıeva úıdi zańsyz salyp alǵan. Al muqtaj eken dep kezeksiz baspana alyp berý qolymnan kelmeıdi deıdi. Alaıda jetekshiniń qarapaıym azamattarmen sóılesý mánerine ókpeliler de az emes eken.

        “Qabyldamaıdy, qol jumsaıdy. “Qalalyq jyljymaıtyn múliktiń” dırektory Strochkov óte dóreki sóıleıdi. Al qyzdary ózimizdi qorqytady”, – deıdi 2 toptaǵy múgedek Gúlnár Ydyrysova.

         Shynymen sheneýnik júgensizdik jasady ma, joq pa ony quqyq qorǵaý organdary anyqtamaq. Osy jaǵdaı boıynsha zábir kórdim degen kóp balaly ana polısıaǵa aryz túsirdi. Ázirge, Arnur Dúıshembıevaǵa 4 balasymen úıindi arasynda ómir súrýge týra keletin syńaıly.

        Negizinde kelinshektiń turyp jatqan jeri Astana qalasynyń ákimdigine tıesili eken. Sheneýnikter ol orynǵa Almaty aýdandyq kirister basqarmasyna arnap avtoturaq turǵyzbaqshy. Sondyqtan kóp balaly ananyń baspanasyn zańdastyrý ekitalaı dep otyr.

Gúlden ÁBDİBAQYT

«Qamshy» silteı