Almaty. Qamshy portaly – Sońǵy kezderi Qazaqstannyń ár aýmaǵynda irili-usaqty sheneýnikterdi aýlaý naýqany bastalyp ketkeni týraly osyǵan deıin de jazǵan bolatynbyz. Al kúni keshe ǵana «Qamshy» portalynda Aınur Tóleý «Etimiz úırenip kele jatyr...» atty materıalynda «Endigi kezek Qazaq handyǵynyń 550 jyldyǵy ótetin aımaqta emes pe? Sol jaqtyń ákimi qymbat kólik alypty» degen bolatyn.
Mine, araǵa kún salmaı jatyp Jambyl oblysynda aýdan ákiminiń burynǵy esepshisi 4,4 mıllıon teńgeni jymqyrǵany úshin jaýapqa tartylǵan degen aqparat taraǵan.
T.Rysqulov aýdanynyń sotynda aýdan ákimdigi bólimderi biriniń bas býhgalterine qatysty qylmystyq is qaraldy.
«Burynǵy bas býhgalter QR Qylmystyq kodeksiniń 4-bólimi 176-babynyń «b» tarmaǵynda (qyzmet babyn paıdalanyp, ózine tapsyrylǵan bótenniń múlkin ıemdený nemese talan-tarajǵa salý), 1-bóliminiń 314-babynda (qyzmettik jalǵan qujat jasaý) kózdelgen qylmystar jasaǵany úshin aıyptalyp, sot aldyna keldi, dep habarlady oblystyq sottyń baspasóz qyzmeti.
2012-2014 jyldary T.Rysqulov aýdany ákimdiginiń áýeli sáýlet, qala qurylysy jáne qurylys bóliminiń bas mamany, odan keıin bas býhgalteri qyzmetijde jumys jasap, birneshe ret jalǵan qujattarmen S.E. esepshotyna bankomat arqyly eńbekaqy, issapar, syıaqy jáne saýyqtyrý tólemderin aýdaryp, búdjet qarajatyn urlaǵan. Memleket qazynasyna keltirilgen zalal 4 436 932 teńgeni qurady.
Bul áıel aıypty dep tanylyp, sot úkimimen jeti jylǵa bas bostandyǵynan aıyryldy. Sot sondaı-aq ony bes jyl merzimge belgili bir laýazymdardy atqarý quqyǵynan aıyrdy.
QR QK 1-bólimi 74-babyna sáıkes jazany óteý úsh jylǵa keıinge qaldyryldy.
Nurzat Toǵjan
