Tanymal rejıser Ermek Tursynovtyń «Jat» fılmi qyrkúıek aıynda ótetin Torontodaǵy Halyqaralyq kınofestıvalge (Toronto International Film Festival) qatysady dep kútilýde. Bul týraly fılmniń bas prodúseri Qanat Tórebaı málimdegen, dep habarlaıdy Qamshy portaly Vlast.kz-ke silteme jasaı otyryp.
Qazaqstandyq «Jat» fılminiń álemdik kórsetilimi Torontoda ótedi. Aıtpaqshy, eń sońǵy ret 2009 jyly atalmysh festıválge Qazaqstannyń atynan Tursynovtyń taǵy bir «Kelin» kartınasy qatysqan bolatyn. Al odan keıin festıvál uıymdastyrýshylary qazaqstandyq fılmderge shaqyrtý bermegen.
«Tipti, qazaqstandyq kartınalardyń Brısben festıváline de sońǵy ret qashan qatysqany belgisiz. Al óz kezeginde Brısben – ol «Azıa Oskary» ekenin eskersek, qazaqstandyq rejıserlerge toqyraý kelgen be dep oılap qalýymyz ábden múmkin», -deıdi Qanat Tórebaı myrza.
Qanat Tórebaı, «Jat» fılminiń bas prodúseri:
«Biz qandaı da bir festıváldiń júldesi úshin júgirip júrgenimiz joq. Biz jasymyz kelip, aqylymyzdy toqtatqan adamdarmyz dep oılaımyn. Biraq Ermektiń kartınasy osyǵan deıin de Oskarǵa usynyldy. Iá, ol – «Kelin» edi. Onyń «Mońǵol» men «Shal» kartınalary halyqaralyq akademıanyń joǵarǵy baǵasyna ıe bolǵan. Sondyqtan biz taǵy bir márte baq synap kórýdi jón kórdik. Buǵan qatystyń degenińiz «Altyn globýsqa» bir taban jaqyndaý degen sóz. «Altyn gblobýsty» alýyńyz – Oskardy alǵanmen birdeı. Biz sońǵy ret Los-Andjeleste «Shaldy» kórsetip júrgenimizde kóptegen kınoakademıanyń akademıkteri Ermek ekeýmizge kelip, ózderiniń tańdanysyn jetkizgen bolatyn. Sonda Ermek maǵan; «Eger «Shal» ótpeı qalsa, men úshinshi ret taǵy kelemin. Ýáde bergen soń oryndaý kerek» degen bolatyn. Iá, eger qazaqstandyq týyndy osyndaı úlken festıválden júldeli bolsa – bul Qazaqstan kınoındýstrıasyndaǵy úlken jetistik bolary sózsiz»,-deıdi.
Tursynovtyń jańa týyndysy «Jat» fılminiń basty rólderinde oınaıtyndar: Erjan Nurymbetov, teratr jáne kıno akteri(«Kelin», «Mech pobedy»), Elına Abaıqyzy qyrǵyz aktırsasy («Qurmanjan Datqa»), Qýandyq Qystyqbaev akter («Kelin»), Aleksandr Karpov, reseılik akter («Vıı3D»), Roza Haırýllına reseıdiń eńbek sińirgen ártisi («Ivan Groznyı»), Erbolat Toǵýzaqov («Shal»).
«Jat» - Dolby Atmos kópkanaldy dybysty formatynda túsirilgen tuńǵysh qazaqstandyq kartına.
2010 jyly Tursynovtyń «Kelin» fılmi Amerıka kınoakademıasynyń tańdaýymen Oskar júldesiniń short-lıst baǵdarlamasyna engen bolatyn. Al 2013 jyly eń úzdik shet tilindegi kartına nomınasıasyna taǵy da Tursynovtyń «Shal» fılmi usynylǵan edi.
Nurzat Toǵjan
«Qamshy» silteıdi
