Koronavırýspen kúresti jáne odan jahandy qutqaryp qalý áreketin beıneleıtin ashyq boıaýly sýretter Tóle bı jáne Chokın kósheleriniń qıylysyndaǵy úı qabyrǵasyna ornalastyrylǵan.

Almaty qalasynyń ákimi Baqytjan Saǵyntaev óziniń Twitter áleýmettik jelisindegi paraqshasynda bul bizdiń densaýlyǵymyz ben qaýipsizdigimiz úshin jan aıamaı kúresip júrgen dárigerlerge, áskerıler jáne polıseılerge alǵys bildirgen ekinshi mýral ekenin jazdy.

Mýraldyń avtorlary – tanymal sýretshiler Tamara Elfımova men Djohar Iýnýsov. Olardyń oıynsha, bul graffıtı pandemıany jeńetinimizdiń sımvoly jáne osynaý kúrdeli kezeńdegi jankeshti eńbekterimizdi eske salyp turýy tıis.

Eske salaıyq, pandemıamen kúreste aldyńǵy shepte júrgen dárigerler eńbegine arnalǵan buǵan deıingi alǵashqy mýraldy Ádı Sháripov kóshesi, 118-úıdiń qasbetine sýretshi Jumadil Elýkenov beınelengen bolatyn.

 

Bizdiń sýretshiler koronavırýspen kúrestiń, Jerdi qutqaryp qalýdyń sımvolyn beıneleıtin mýral saldy. Bul — densaýlyǵymyz ben qaýipsizdigimizdi qorǵaýda janyn pıda etip júrgen dáriger, áskerıler men polıseılerge alǵys retinde salynǵan qaladaǵy ekinshi graffıtı. #AlmatyBirgemiz pic.twitter.com/ZLR8nHpGlH

— Bakytjan Sagıntaev (@sagintayev_b) May 13, 2020