QR Memlekettik bilim granttarynyń tizimi jarıalanǵan eki kúnniń ishinde Qazaqstannyń ár tarabynda bilim granttarynyń bólinýine qatysty túrli daý-daımaılar da kúsheıe bastady. Orta mektepti úzdik támamdaǵan taǵy bir astanalyq túlek memlekettik bilim granttary ıegerleri qatarynan ózin taba almaǵan. Bul týraly «Qamshy» portaly KTK-ǵa silteme jasaı otyryp habarlaıdy.

«Men Eýrazıalyq ulttyq ýnıversıtetke tapsyrǵan bolatynmyn. Munda 89 bal jınaǵandar túsip jatyr. Al men 100 balmen túse almaı otyrmyn. Tipti atestatymda da kil bestikter. Men tańqalyp otyrmyn»,-deıdi abıtýrıent Araı Nurjanova.

KTK arnasynyń málimetinshe, Araı Ońtústik Koreıdegi halyqaralyq bilim olımpıadasynyń júldegeri bolǵan.

Osyǵan deıin qazaqstandyq BAQ-ta taǵy bir astanalyq oqý úzdigi Juldyz Ospannyń joǵary balmen bilim granty ıegerleriniń qataryna ilikpeı qalǵandyǵy týraly jazǵan bolatyn. Al Juldyz  bolsa, mektepti 11 jyl úzdik oqyp, matematıkadan halyqaralyq olımpıadanyń qola júldegeri bolǵan. Alaıda munyń bári bilim grantynyń ıegeri atanýǵa jetkiliksiz bolǵan.

Buǵan ashýlanǵan ata-analar qalaı da óz balalarynyń bilim granttaryn alyp beretindikterin aıtýda. Ata-analar memlekettik komısıa sheshimimen tolyq kelispeıtindikterin jáne QR Bilim jáne ǵylym mınıstri Aslan Sárinjipov myrzanyń tilkeleı qabyldaýyn talap etip otyr. Olar bilim mınıstriniń memlekettik bilim granttaryn qalaı bólgendigi  jóninde jaýap berýin qalaıdy.

Nurzat Toǵjan