Jaqynda «DEMOSCOPE» qoǵamdyq pikirge ekspress-monıtorıng júrgizý búrosy Qazaqstandaǵy sýmen jabdyqtaý qyzmetiniń sapasy» taqyrybynda saýalnama júrgizgen bolatyn. Bul týraly «Qamshy» portaly habarlaıdy.
DEMOSCOPE qoǵamdyq pikirge ekspress-monıtorıng júrgizý búrosy ótkizgen saýalnamaǵa Astana, Almaty qalalary men Qazaqstannyń 14 oblys ortalyǵynan 18 jastan asqan 1822 adam qatysqan. Saýalnamaǵa qatysqandardyń 72%-y áıelder jáne 28%-y er azamattar.
Saýalnamaǵa qatysqan qazaqstandyqtardyń 39%-y Qazaqstandaǵy sýmen jabdyqtaý qyzmetiniń baǵasyna jáne sapasyna eshqandaı syn aıtpaǵan. Al respondentterdiń 18%-y Qazaqstandaǵy sýmen jabdyqtaý qyzmetine kóńilderi tolatyndyqtaryn aıtqan. Saýalnamaǵa qatysýshylardyń 16%-y qyzmet kórsetý sapasyn óte qymbat dese, 13%-y qyzmet kórsetý sapasyn óte nashar dep baǵalaǵan. Sonymen qatar, bul qyzmet kórsetý túrine beı-jaı qaraıtyn qatysýshylar 6% bolsa, suraqqa naqty jaýap bere almaǵandar 8% -dy quraǵan.
Zertteý qorytyndysy boıynsha, saýalnama qatysýshylarynyń 60%-y kóp qabatty birneshe páterden turatyn úıde, 29%-y qala ishinde ornalasqan jeke úıde, 11%-y qala syrtyndaǵy jeke úıde ómir súrip jatqandar dep kórsetilgen.
81% respondentterdiń úıi jylý jáne sý qubyrlarynyń (kanalızasıa) ortalyqtandyrylǵan júıesine qosylǵan. Qalǵan 19%-ń úıine bul júıe ornatylmaǵan.
«Qazaqstannyń sý sektoryndaǵy eń ózekti másele qandaı?» degen saýalǵa qatysýshylar respondentterdiń 27%-y eshqandaı másele joq dese, 21%-y sýdyń sapasyna kóńil tolmaıtyndyqtaryn aıtyp shaǵymdanǵan. Sonymen qatar, 16%-y ınfoqurylym tozǵan, naqty aıtqanda sý qubyrlary eskirgen degen jaýap nusqasyn tańdaǵan.
Al, zertteýdiń 6%-yn quraǵan saýalnama qatysýshylary keı kezderi sý toqtap qalady nemese úzilispen keledi deıdi.
Almaty qalasy turǵyndarynyń 29%-y jáne Shyǵys Qazaqstan oblysy turǵyndarynyń 31%-y úshin ınfoqurylymnyń tozyǵy jetýi Qazaqstannyń sý sektoryndaǵy eń ótkir másele bolyp otyr. Suraqtarǵa jaýap bergen astanalyqtardyń 27%-y, Aqmola oblysy turǵyndarynyń 64%-y jáne Soltústik Qazaqstan oblysy turǵyndarynyń 26%-y sýdyń sapasy nasharlyǵyna shaǵymdanady.
Al, Ońtústik Qazaqstan oblysy atynan saýalnamaǵa qatysqan qazaqstandyqtardyń 34%-y sý jáne sýmen jabdyqtaý qyzmetindegi qymbatshylyqty sý sektoryndaǵy eń ózekti máselege jatqyzdy.
Sý qubyrlary arqyly keletin sýdy densaýlyqqa qaýipti dep esepteıtin qatysýshylardyń kóp bóligi Atyraý oblysynda ómir súredi eken. Saýalnamaǵa qatysqan atyraýlyqtardyń 32%-y, almatylyqtardyń 22%-y jáne aqtóbelikterdiń 27%-y sý qubyrlary arqyly keletin sýdy aýyz sý retinde tutynbaýǵa tyrysady.
Nurgeldi Ábdiǵanıuly
