Elimizde Qazaq handyǵynyń 550 jyldyq mereıtoıyna oraı kompúterlik oıyn jasalyp jatyr. Joba tarıhty nasıhattaý maqsatynda qolǵa alynyp otyr. Bul  týraly "Qamshy" aqparattyq portaly "Nur.kz" saıytyna silteme jasaı otyryp habarlaıdy.

Oıyn keıipkeri retinde Qobylandy batyr, Qorqyt ata sıaqty ańyz  tulǵalar men qatar ertegilerdegi Jalmaýyz kempir de kórinedi. Joba qazaq ultynyń ulttyq naqyshtaǵy boıaýlarymen kórinis bermek.  Kompúterlik oıyndy jasap, aınalymǵa engizýge Bilim jáne ǵylym mınıstrligi men Dúnıejúzilik bank qoldaý tanytyp, 72 mıllıon teńge bólipti.

Joba avtory Ádilbek Bısenbaev: “qazirgi jastar kitaphanaǵa barmaıdy. Olar qajetti aqparatty ǵalamtordyń kómegimen bilip otyrady. Ásirese kompúterlik oıyndardy kóp paıdalanady. Máselen Batysta oıyn óndirisin damytý arqyly óz mıfologıasyn nasıhattaıdy. Biz de osy ádisti paıdalanyp, óz tarıhymyzdy álemge tanytpaqpyz. Sondyqtan álemdik deńgeıdegi óte kúrdeli kompúterlik oıyn túrin jasaýdy qolǵa aldyq. Ony tegin jáne aqyly negizde de oınaýǵa bolady".

Joba keler jyly qoldanysqa berilmek. Eger kópshiliktiń kóńilinen shyǵyp jatsa, onda mobıldik nusqasy da shyǵarylatyn bolady.

Qazaqstanda alǵashqy bolyp shyǵarylǵan ulttyq naqyshtaǵy  messendjer "iTys" jobasy sıaqty qoldanýshysy qaýqarsyz, jarnamasy jasyq bolmaı, bul joba da urpaqtarǵa tarıhty nasıhattaý turǵysynan qarastyrylatyn bolsa, óz deńgeıimen nátıje bergeni ótimdi bolar edi.

Gúlden ÁBDİBAQYT