Bul týraly «Qamshy» portaly NUR.KZ-ke silteme jasaı otyryp habarlaıdy.

59 jastaǵy elshi tańǵy asqa nan, qaımaq pen shubat jegendi unatady eken. Uzaq ýaqyt Shyǵys Eýropa, Ýkraına, Belorýssıa jáne Reseıde jumys istep kelgen Krol búginde Astanada qyzmet etýde.

“Qyshqyl sút ónimderin qatty unatamyn. AQSH-ta mundaı azyq-túlikterdi tappaısyń. Keı-kezderi tek aıran men qaımaqqa bola shetelde jumys istep júrgendeı bolamyn. Kún saıyn sýpermarketke baryp, 285 teńgege aıran, 240 teńgege sút satyp alamyn “, – dep kúledi elshi.

“Qazaqstanda meni túrimnen tanıtyndar az. Ózimdi qaýipsizdikte sezinip, jalǵyz bazar aralaı alamyn. Tashkentte bolsa, men djınsy kıip, rúkzak asynyp, metromen júretinmin”, – deıdi Krol.

Elshi qysta qoǵamdyq kólikterdi paıdalanatynyn aıtýda. Onyń oıynsha jolaqyny 90 teńge etkeni yńǵaıly emes.

“Men jolaqy tóleý úshin tıyn sanap, 90 teńge izdep turǵannan qysylamyn. Jolaqy 100 teńge bolǵanda yńǵaılyraq bolar edi. Al qazirde qoǵamdyq kólikke otyrý úshin ózińmen kóp maıda aqsha alyp júrýiń kerek. Nemese qaıyrymyn kútip, turyp qalasyń”, – dep aǵynan jaryldy Krol.

Elshi Sankt-Peterbýrgtiń yzǵarly aımaqtarynda turyp kórgenniń arqasynda Astananyń sýyǵynan qoryqpaıtynyn jetkizdi. Oǵan mundaı óńirlerde eń bastysy monsha bolsa jetkilikti eken.

“Keıbireýler jeksenbi saıyn shirkeýge barady. Al men monshaǵa baryp, tazarǵandy jón kóremin”, – dep jalǵastyrdy elshi.

Kóp eldi kórgen Krol ár memlekettiń adamdary ár túrli ekenin baıqaǵan. Ol tipti bir memlekettiń ózinde admadar ár túrli bolady degen pikirde.

Qazaqtar alǵash kezdestirgende sýyq adamdar sıaqty kóringenimen, óte ashyq adamdar

“Menińshe, amerıkalyqtar qansha ashyq bolyp kóringenimen, ishteı ózderine eshkimdi jaqyndattyra bermeıdi. Qazaqtar bolsa, kerisinshe, alǵash kezdestirgende sýyq adamdar sıaqty kóringenimen, óte ashyq adamdar. Men úshin qazaqpen dostasý nekege turýmen birdeı bolyp kórinedi”, – deıdi Krol.

Krol elshiliktegi qyzmetkerlermen birigip, elshilik mańyna kıiz úı ornatqan eken. Shańyraǵyn turǵyzýǵa ózi atsalysqan elshi búginde qabyldaýlardy kıiz úıdiń ishinde ótkizip júr.

“Meniń elshi áriptesterim kıiz úıge alyp kirgende ań-tań bolyp jatady. Kıiz úı syılastyq belgisi bolyp qana qoımaı, biraz máselelerdi sheshedi. Elshilikte is-shara ótkizetin oryn az. Kıiz úı – bul jaǵdaıdyń ońtaıly sheshimi”, – dep jalǵastyrdy elshi.

Krol prezıdent Nursultan Nazarbaevty ómirinde tek bir ret kezdestirgen eken. Ol Nazarbaevtyń jaıdarly adam bolyp kóringenin aıtýda. Qazaqstanda bar-joǵy 6 aı bolǵan Krol, tek Almaty men Astanany kórgen bolyp shyqty.

Elshi Qazaqstanǵa kelip, jylqynyń etin jeýdi úırengenin aıtýda.

“Men buryndary salt atty adam bolatynmyn. Jylqynyń ústinde shapqandy qatty unatatynmyn. Al munda kelip, men jylqylardy jeýdi úırendim”, – dep aǵynan jaryldy Krol.

Nurzat Toǵjan