Belgili ánshi Álı Oqapov «Aq jelken» jýrnalyna bergen suhbatynda bolashaq jary qandaı bolýy kerek ekendigin jáne óz basynan ótken qyzyqty jaǵdaılarymen bólisti.

Álı betin qaıtarǵan qyzdar týraly saýalǵa: “Eń birinshi meni qaıtarǵan qyz – meniń alǵashqy mahabbatym. Birinshi synypta synyptasyma ǵashyq boldym. Esimi – Eńlik. Ol skrıpkashy edi, biz mýzyka mektebinde oqydyq qoı. Sol qyz jetinshi synypqa deıin birge oqyǵanda, birde-bir ret maǵan kóz qıyǵyn salǵan da joq. Soǵan qarap, «e-e, men oǵan unamaıdy ekenmin» dep túıdim de qoıdym”, – dep jaýap berdi.

Ánshiniń betin qaıtarǵandar bertinde de bolypty.

“Boldy. Osydan úsh- tórt jyl buryn… Menińshe, ol ár jigittiń basynda kezdesedi. Sen qanshalyqty tanymal, aqyldy bolsań da, unatpaıtyn adam unatpaıdy”, – dep aǵynan jaryldy ánshi.

Jas ónerpaz basylymǵa bolashaq jaryna degen qoıylatyn talaptary týraly da jasyrmady.

“Eń birinshi qazaqy tárbıe dedim be, sosyn aqyl. Ártispen turý tipti ońaı emes! Ánshi ǵana emes, men sazgermin de. Sondyqtan maǵan jıi ońasha qalý qajet bolady. Jańa án týýy úshin. Ondaı jaǵdaıda jarym meni túsinip, qoldamasa, jaǵdaı qıyn. Al aqylsyz qyz meniń munyma kónbek túgili, túsinbeıdi de. Otbasynda kıkiljiń sodan týady”, – dep qaıyrdy ánshi.

Álı boıjetkenderge kelgende tanysýǵa qorqaqtap qalatynyn, qobaljyp ketetinin de jasyrmady. Sondyqtan, ánshiniń aıtýynsha, qyzdar alǵashqy tanysý qadamyn ózderi jasasa, qarsy bolmaıtyn kórinedi.

Al Álıdiń anasy, Qazaqstan Halyq ártisi Roza Rymbaevanyń bolashaq kelinge qoıatyn talaptary bar ma degen saýalǵa ánshi:

“Joq, eshqashan aıtqan emes. Jalpy, bala kúnimnen bastap úlken jaýapkershilikti qajet etetin tańdaý jasarda anam maǵan erkindik berip keldi. Mýzykany ózim tańdadym. Ánshilikti de. Mektep bitirgen soń, AQSH-qa oqýǵa da tústim. Elimdi qatty saǵynyp, shetelde jyraqta júrý maǵan unamaı, qaıta oraldym. Onda da maǵan eshteńe degen joq. Sondyqtan da bir kúni úıge qalyńdyǵymdy jetektep baryp, «osy qyzǵa úılenemin» dep jarıa etsem, qarsy bolmaıdy dep oılaımyn”, – dep jaýap berdi.