«Abaılańdar, balalar!» jedel-aldyn alý sharasynyń aıasynda Almaty polıseıleri qala joldaryndaǵy oqýshylardyń qaýipsizdik sharalaryn kúsheıtti. Sharalardyń biri jalpyǵa bilim beretin oqý oryndarynda «KRIS-P» jyljymaly fotoradar keshenin ornatý boldy. Bul týraly qalanyń İİD baspasóz qyzmetine silteme jasaǵan Qazaqparat saıty habarlaıdy.
«Bul aksıa 20 tamyzda bastalǵan. Ol oqýshylardyń mektepke qaýipsiz jolyn qamtamasyz etý úshin jol-patrýldik polısıasy ınspektorlarynyń jappaı kezekshiligin qamtıdy. Alaıda, qalada qarqyndy jol qozǵalysymen ótkel bóligine tikeleı jaqyn ornalasqan oqý oryndary bar. Bul ýchaskelerge júrgizýshiniń jaýapkershiligin arttyryp, olardyń tártibin jaqsartatyn barynsha pármendi sharalar qajet, sol úshin «KRIS-P» júıesiniń resýrsyn paıdalanýdy sheshtik: oqý jylynyń basynan bastap olar mektepterdiń janyna ishinara ornatyldy», - dep habarlady Almaty q. İİD ákimshilik polısıa basqarmasy bastyǵynyń orynbasary polısıa polkovnıgi Jandos Muratalıev.
Atap aıtqanda, polıseılik tehnıka «Aınabulaq» shaǵyn aýdanyndaǵy Muqataev kóshesi boıynsha ornatyldy. Shet aýdanda ótkel bóligi mańynda eki mektep ornalasqan. Aksıanyń belsendi qatysýshysy «Jalpy jol» jol qozǵalysy qaýipsizdigi qaýymdastyǵy ókilderiniń aıtýynsha, birjaqty qozǵalys ýchaskelerinde kóbinese jyldamdyqty arttyryp, qoǵamdyq kólik júrgizýshileri jol qozǵalysy qaǵıdasyn buzady.
«Bul rette praktıka tek jazalaý sharalarymen jaǵdaıdy jaqsarta almaıtyndyǵyn kórsetti, jol qozǵalysyna ár qatysýshy, ásirese júrgizýshi asa joǵary jaýapkershilikpen qarap qana eldiń eń iri megapolısinde jol jaǵdaıyna oń yqpal ete alady. Júrgizýshilerge kúndiz shamdy jaǵý, qaýipsizdik beldigin qoldaný, balalardy ustaıtyn qurylǵyny paıdalaný, júrginshi jolynda jol qaǵıdasyn saqtaý, qala joldarynda jyldamdyqty asyrmaý qajettiligi jıi aıtylady», - dedi polkovnık.
Sondaı-aq, Almaty ákimshilik polısıa basqarmasynda oqý bastalar aldynda avtokásiporyn, garaj kooperatıvteri, avtobýs jelilerinde júrgizýshilermen áńgimelesip, jolda balalarǵa asa kóńil bólýdi arttyrý, qaýipsizdik beldigin mindetti túrde qoldaný týraly nusqaý berildi.
