Keshegi májilistiń otyrysynda qarjy mınıstri elimizde bes jyldan keıin jurt jappaı deklarasıa tapsyratynyn jetkizdi.Soǵan qatysty zań jobasyn tanystyrdy.Bul týraly «Qamshy» portaly KTK arnasyna silteme jasaı otyryp habarlaıdy.
“Jeke tulǵalar deklarasıa tapsyrǵanda, aqshasyn jeke shotyna salyp kórsetý kerek. Biraq adamdardyń barlyǵy qarjysyn bankte ustamaıdy. Sondyqtan 3 mıllıon teńgeni qolda ustaýǵa ruqsat etilip otyr. Al nesıe men depozıtke kelsek, tek sheteldik bankterdegi shottar ǵana esepke alynady”, – deıdi Bahyt Sultanov.
Deklarasıa tapsyrý eki kezeńmen júzege aspaq. Úkimet aldymen synaq retinde memlekettik qyzmetkerler jáne ulttyq kompanıa qyzmetkerleriniń tabysy men múlkin esepke almaq. Ol 2017 jyldan bastap júzege asady. Tek 2020 jyly jalpy halyqqa deklarasıa tapsyrý mindetteledi.
Qazir elimizde tek depýtattar men sýdıalar ǵana mal-múlki týraly esep beredi. Qarjy mınıstriniń aıtýynsha, bul júıe elimizge tabystyń qaıdan jáne qansha kólemde kelip jatqanyn anyqtaýǵa múmkindik bermeıdi eken.
Sondyqtan zańǵa ózgeris engizip, árbir kámelettik jasqa tolǵan azamat, oralmandar men Qazaqstanda múlki bar sheteldikterge deklarasıa tapsyrý mindettelmek. Iaǵnı, árkim qansha qarjysy, úıi, jeri, kóligi baryn kórsetýi kerek.
