Búginnen bastap qazaqstandyqtar júrgizýshi kýáligi men tehnıkalyq tólqujatsyz kólik júrgize berýine bolady.

13 aqpanda "Qazaqstan Respýblıkasynyń keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń zańy kúshine endi.

Júrgizýshilerge ózderimen birge júrgizýshi men kólik quralyn tirkeý kýálikterin alyp júrmeýge bolady. Osy qujattardyń joqtyǵy úshin azamattar ákimshilik jaýapkershilikke tartylmaıdy. Júrgizýshiler ózimen birge jeke basyn kýálandyratyn qujattyń túpnusqasyn alyp júrýi tıis.

Quqyq qorǵaý organdarynyń qyzmetkerleri kólik ıesi kim ekenin aqparat júıeleri arqyly tekseredi. Qyzmettik planshetterde "ákimshilik óndiristerdiń biryńǵaı tizilimi" baǵdarlamasy ornatylǵan. Onda júrgizýshi men kólik týraly barlyq derekter: avtokólik quraly kimge tıesili ekeni, qandaı quqyq buzýshylyqtar tirkelgeni, tehnıkalyq baıqaýdan ótken-ótpegeni jáne saqtandyrý polısi resimdelgeni týraly derekter bolady. Búginde patrúldik polısıanyń saptyq bólimshelerinde osyndaı 8 649 planshet bar.

Jeke basty kýálandyratyn qujattarǵa Qazaqstan Respýblıkasy azamatynyń pasporty, jeke kýálik, azamattyǵy joq adamnyń kýáligi jatady. Stýdenttik bılet, qyzmettik kýálik bul tizimge kirmeıdi.

Bul ózgeris sheteldik nómirleri bar kólikterge, sondaı-aq Qazaqstannan tys jerlerde júrgizý quqyǵyna kýálik alǵan júrgizýshilerge qatysy joq. Olar júrgizý kezinde júrgizýshi kýáligin jáne kólik quralyn tirkeý kýáligin kórsetýge mindetti.