Janbolat Mamaı qaıtse de Baýyrjan Baıbekti qaralaý úshin Almatyda júrgizilgen barlyq reformalardy túbegeıli joqqa shyǵaryp, bárin tóńkerýge daıyn. Onyń osyndaı maqsatpen jasaǵan jalǵan málimdemelerdiń biri – temir qorshaýlar men bılbordtardy alyp tastaý kezinde qyzmet babyn asyra paıdalandy degen aıyptaýy. Baýyrjan Baıbektiń zańgeri Aıjan Táshenova Áýezov aýdandyq №2 sotynda ótip jatqan azamattyq-prosessýaldyq proseste osylaı dedi.

Onyń aıtýynsha, qalanyń kórkin aıtarlyqtaı buzǵan qorshaýlardy alyp tastaý týraly bastamaǵa megapolıs turǵyndary túsinistikpen qarap, qoldaý bildirgen. Osylaısha, menshik ıeleri ákimdiktiń uıǵarymy boıynsha qorshaýlaryn ózderi bólshektep, olardy ózderine qaldyrǵan. Metal, shoıyn, aǵash, beton jáne basqa da materıaldardan jasalǵan qorshaýlar bólshekteldi.

– Komýnaldyq menshik nysandarynyń bólshektelgen qorshaýlarynyń bir bóligi mektepter, balabaqshalar jáne basqa da nysandardyń aınalasyndaǵy jaramsyz qorshaýlardy aýystyrý kezinde paıdalanyldy. Paıdalanýǵa jaramsyz shaǵyn bóligi qalalyq polıgonǵa shyǵaryldy. Alynǵan qorshaýlardyń bir bóligi "Almaty Tazalyq" MKK-da boldy. Munyń bári qalany abattandyrý maqsatynda jasaldy jáne BAQ-ta belsendi túrde jarıalandy, – dedi A.Tashenova.

Zańger bir kezderi Almatynyń kósheleri óte úlken, kózge qorash jarnama taqtalarynan kóz ashpaı qalǵanyn aıta kele, 2015 jylǵy qarashada Almaty qalasy máslıhatynyń №381 sheshimimen jarnamalyq konstrýksıalardyń jańa úlgileri men ólshemderin retteıtin qalany abattandyrý erejelerine ózgerister engizilgenin alǵa tartty.

Sottyń 2016 jylǵy sheshimimen Almatyny Abattandyrý erejelerine tıisti ózgerister zańdy dep tanyldy.

– Kásipkerlerge 2016 jyldyń 1 sáýirine deıin bılbordtardy atalǵan talaptarǵa sáıkes keltirýge múmkindik berildi. 5 aı – bılbordtardy aýystyrý úshin jetkilikti ýaqyt. Kóptegen kompanıalar osy kezeńdi paıdalanyp, bılbordtaryn jańartty. Alaıda, keıbir kásipkerler bul múmkindikti paıdalanbaı, sol arqyly máslıhat qabyldaǵan Erejeni buzdy, – dedi zańger.

Advokat Erejege baǵynbaǵandardyń biri retinde "Prior Print" kompanıasyn atady. Ákimdik atalǵan kompanıaǵa 9 aı ishinde erikti túrde kemshilikterdi joıý úshin sharalar qabyldaý týraly birneshe ret hat joldaǵan. Alaıda olardyń tarapynan eshqandaı áreket jasalmaǵanyn, osydan soń zań buzýshylarǵa qatysty zańnamaǵa sáıkes tıisti shara qabyldanǵanyn atap ótti.

– Munda da Mamaı ádettegideı kópshilikti shatastyrý úshin báriniń óńin teris aınaldyrýda. Jalpy, bul jerde Baýyrjan Baıbektiń 2 jyldan beri Almaty qalasynyń ákimi bolyp jumys istemeıtinin, degenmen, onyń tusynda engizilgen barlyq bastamalar qala men onyń turǵyndaryna áli de paıdasyn tıgizip otyrǵandyǵyn basa aıtqym keledi. Eger olar zańsyz bolsa, turǵyndar qoldamas edi jáne qalanyń damýyna yqpal etpes edi, onda olardy Almatynyń jańa basshylyǵy teristep, jalǵastyrmaǵan bolar edi, – dedi A.Tashenova.