"Ádildik joly" qoǵamdyq birlestiginiń atqarýshy dırektory Dıdar Smaǵulov Abaı aýdanyndaǵy órtten bolǵan adam shyǵynyn sybaılas jemqorlyqpen tikeleı baılanystyryp, buǵan SHQO ákiminiń mindetin atqarýshy Danıal Ahmetovtyń kináli ekenin málimdedi. 

"Shyǵys Qazaqstan oblysynyń orman sharýashylyǵyndaǵy jemqorlyqqa kim kináli? Prezıdent Tótenshe jaǵdaılar mınıstrin qyzmetinen bosatyp, Abaı aýdanynyń ákimine sógis jarıalady. Iá, Uranhaevtyń oblysty basqaryp kele jatqanyna bir jyl boldy. Ol mundaı mańyzdy salany retke keltirý kerek edi. Biraq biz Shyǵys Qazaqstan oblysy bólingenge deıin bul aımaqty toǵyz jyl buryn ókilettigi resmı túrde aıaqtalǵan zeınetker Ahmetov basqarǵanyn (aımaqty osyndaı jaǵdaıǵa jetkizgenin) esten shyǵarmaýmyz kerek" – dedi Smaǵulov áleýmettik jelidegi paraqshasynda.

Sonymen qatar, ol qaıtys bolǵandardyń eshqandaı qorǵanys quraldary bolmaǵanyn málimdedi. Mert bolǵandar qorǵanys kostúmderi men ottegi maskalarynsyz, bireýi jáı aıaq kıim kıip shyqqanyn da aıtty.

"Tipti, rasıalardyń batareıalary bolmaǵan. Olardy ólimge óz aıaǵymen jiberdik. 2016 jyldan bastap "Semeı Ormany" rezervatyna 5,3 mlrd teńgeden astam qarajat bólindi. Bıyl  Orman órtimen kúresý jónindegi aqparattyq júıeniń úzdiksiz jáne táýlik boıy jumys isteýine 12 mln teńge qarastyrylǵan. Flesh-dıskiler, kiltter men telefon ustaǵyshtaryna 7,5 mln bólingen. 22 mamyrda 484 myńǵa 55 radıoqabyldaǵysh batareıa satyp alynǵan. Eger rasıalar jumys istese, qaza tapqandarǵa bireý jelge qaraı bet alǵandaryn eskertip úlgerer edi. Alaıda jemqorlyq bizdi óltirip jatyr, biz osyǵan únsiz qarap otyrmyz. Men basshylar halyqtan keshirim suraıdy (qazirgi el basshysy halyqtan keshirim suraǵan kezi bolyp pa edi) jáne prezıdent "barlyq kináliler ádil jazalanady" degen ýádesinde turady dep senem. Olar Ahmetovti de umytpaıdy dep úmittenem" –  dep jazdy Dıdar Smaǵulov.

Eske sala keteıik, Abaı oblysynda bolǵan orman órtinen 14 adam qaza taýyp, elimizde jalpyulttyq aza tutý kúni jarıalanǵan edi. Búgin taǵy bir ormanshynyń joǵalyp ketkeni belgili bolyp, izdestirý jumystary júrgizilip jatyr.