Qazaqstanda atom energetıkasyn damytý máselesi kópten beri kóterilip keledi. Bul salanyń perspektıvasy zor ekeni anyq. Bizde ıadrolyq otyn óndirisi tolyqtaı derlik ıgerilgen. Shaǵyn reaktorlardy paıdalaný tájirıbesi jınaqtaldy. Bul baǵytta mamandar men ǵalymdarymyz da bar. Kadr daıarlaýǵa da kóńil bólinip keledi. Sondyqtan atom energetıkasyn damytýdyń kelesi kezeńine kóshý durys qadam. Ásirese, elimizdiń energetıkalyq ınfraqurylymyna júkteme artyp otyrǵan búgingideı jaǵdaıda bul máseleniń mańyzy aıryqsha, – dedi Bektenov.

Premerdiń sózinshe, Qazaqstan qazirdiń ózinde energetıkalyq qýat tapshylyǵyn tartyp otyr.

- Problemany osy bastan sheshpesek, onda ekonomıkanyń ári qaraı ósýine qajetti elektr energıasyn úlken kólemde satyp alýymyzǵa týra keledi. Kóptegen el atom energıasyna ıek artady. Atom energıasy jónindegi halyqaralyq agenttiktiń málimetinshe búginde álemniń 31 elinde 415 ıadrolyq energoblok jumys isteıdi. Qazirgi tańda 15 memlekette, sonyń ishinde Qytaı, Japonıa, Ońtústik Koreıa, Ulybrıtanıa men Túrkıada jańadan 61 atom stansıasynyń qurylysy júrip jatyr. Onyń ústine halyqaralyq qarjy ınstıtýttary kómir elektr stansıalaryna ınvestısıa salýdan bas tartyp jatyr, – dedi Úkimet basshysy.