ALMATY. QazAqparat - Almaty densaýlyq saqtaý jáne bilim berý uıymdary halyq aldynda jarıa esep beretin boldy. Mundaı talapty qala ákimi, ári «Nur Otan» partıasy qalalyq fılıalynyń tóraǵasy Baýyrjan Baıbek búgin ótken saıası keńes búrosynyń otyrysynda qoıdy. 
Ákimniń aıtýynsha, densaýlyq saqtaý men bilim berý salalarynda jemqorlyqqa qatysty qala turǵyndarynyń narazylyǵy óte joǵary. 

«Osy eki sala boıynsha halyqtyń narazylyǵy kóp. Bas dárigerlerge kirý meniń kabınetime kirgennen de qıyn. Eshqandaı qoldaýsyz aýrýhanalarǵa túsýdiń ózi qorqynyshty. Mektep dırektorlary da jaǵympaz ata-analardyń qolymen aqsha jınaýyn jalǵastyryp jatyr. Ata-nalar birdeńe aıtýdan qorqady», - dedi qala ákimi. 

Ákimniń orynbasary Záýresh Amanjolovanyń aıtýynsha, 1 qazan men 1 qarasha aralyǵynda barlyq bilim berý mekemelerinde qosymsha aqsha jınaýǵa qarsy aksıa ótedi. 

Osyndaı quqyqbuzýshylyqqa jol bergeni úshin jaqynda №60 mektep-gımnazıasynyń dırektory qyzmetinen aırylǵan. 

«Bul eki salaǵa halyqtyń syny zor. Talaby qatty. Óıtkeni, bul salalardyń halyqqa bereri kóp. Bıyl is júzinde jumys jasamaıtyn muǵalimder úshin aqsha alyp otyrǵan 5 mektep dırektory qylmystyq jaýapkershilikke tartyldy. Olar №6, №146, №172, №184, №105 mektep dırektorlary. Sondaı-aq Alataý aýdandyq bilim bóliminiń basshysy da bar. Densaýlyq saqtaý salasyna kelsek, baqylaý organdarymen 5 basshy qyzmetinen alyndy. Onyń ekeýi boıynsha áli qylmystyq tergeý jalǵasyp jatyr. Adamdar kóbine tirkeý bóliminiń jumysyna, dárigerdiń qabyldaýyn uzaq kútýge týra keletindigine narazylyq bildirip otyr», - dedi Záýresh Amanjolova. 

Qala ákiminiń orynbasary Záýresh Amanjolovanyń baıandamasynan soń memlekettik mekemelerde kiris jáne shyǵys esebi týraly jańa talap engizildi. Endi ár emhananyń bas dárigeri, mektep dırektory, balabaqsha meńgerýshisi turǵyndar men ata-analar aldynda esep berýge mindetteledi. 

Qala ákimi aıtqandaı, almatylyqtar osy qurylymdarǵa búdjet tarapynan bólingen qarajattyń qalaı, qaıda jumsalyp jatqanyn bilýi tıis.
Baýyrjan Baıbek 1 qarashaǵa deıin jaýapty tulǵalarǵa atqarýshy organdar men salalyq qurylymdardyń qyzmetindegi tıimdilik, ashyqtyq jáne esep berýdi jaqsartýdyń jol kartasyn qabyldap, bekitýdi tapsyrdy. 

Ázirge bul bastama halyqtyń basym kópshiliginiń narazylyǵyn týdyryp otyrǵan densaýlyq saqtaý jáne bilim berý salalarynan bastalady. Keıin barlyq qurylymdar halyq aldynda BAQ arqyly esep beretin bolady.

Derekkóz: QazAqparat