Qazaqstanda Mindetti medısınalyq saqtandyrý qoryna jarna tóleýden azamattardyń 15 sanaty bosatylady. Bul týraly «Qamshy» portaly primeminister.kz. –ke silteme jasap habarlaıdy.
«Mindetti aı saıynǵy jarnalar men medısınalyq qyzmetterdi satyp alýdy toptastyrý úshin QR DSÁDM Medısınalyq qyzmetterdi tóleý komıtetiniń bazasynda komersıalyq emes aksıonerlik qoǵamnyń uıymdastyrýshylyq-quqyqtyq formasynda «Áleýmettik medısınalyq saqtandyrý qory» qurylatyn bolady. Qordyń quryltaıshysyy ári jalǵyz aksıoneri QR-nyń Úkimeti bolmaq», - dep habarlady Astanada ótken «Mindetti áleýmettik medısınalyq saqtandyrý týraly» QR Zańynyń normalaryn túsindirýge arnalǵan brıfıńte QR densaýlyq saqtaý jáne áleýmettik damý vıse-mınıstri Alekseı Soı.
Onyń aıtýynsha, atalǵan Qorǵa jarna tóleýden azamattardyń 15 sanaty bosatylady. Onyń ishinde: balalar, «Altyn alqa», «Kúmis alqa» ıegerleri, buryn «Batyr Ana» atanǵandar, sonymen qatar I jáne II dárejeli «Analyq dańq» ordenimen marapattalǵan kóp balaly analar; UOS ardagerleri men múgedekteri; múgedekter; jumyssyz retinde tirkelgen azamattar; ınternat mekemelerinde oqytylyp, tárbıelenip jatqan tulǵalar; sondaı-aq tehnıkalyq, kásiptik, orta bilimnen keıingi jáne joǵarǵy bilim berý uıymdarynda kúndizgi bólimderde, sonymen qatar rezıdentýra formasyndaǵy JOO-dan keıin bilim alyp jatqan tulǵalar bar.
Budan ózge, jarna tóleýden bala týýǵa, bala asyrap alýǵa, 3 jasqa deıingi bala kútimine baılanysty demalystaǵy tulǵalar; jumys istemeıtin júkti áıelder, is júzinde 3 jasqa deıingi balany tárbıelep otyrǵan jumyssyz azamattar; zeınetkerler; áskerı qyzmetkerler; arnaýly memlekettik qyzmet jumyskerleri; quqyq qorǵaý organdarynyń jumyskerleri; eń tómengi deńgeıdegi qaýipsizdik mekemelerin eseptemegende sot sheshimimen QAJ mekemelerinde aıybyn óteýshiler; ýaqytsha ustaý oqshaýlaǵyshtary men tergeý oqshaýlaǵyshtaryndaǵy azamattar bosatylady.
A.Soı eske salyp ótkendeı, «Mindetti áleýmettik medısınalyq saqtandyrý týraly» Zań bıylǵy jyldyń 29 qazanynda QR Parlamentinde qabyldandy. Atalǵan qujatty QR DSÁDM QR Zań jobasyn Memleket basshysy aıqyndaǵan bes ınstıtýsıonaldyq reformany iske asyrý jónindegi 100 naqty qadam - Ult josparynyń 80-shi qadamyn iske asyrý sheńberinde ázirlegen. Zańdy daıyndaý barysynda úzdik halyqaralyq tájirıbe men áleýmettik ádilettilik qaǵıdalary qoldanyldy.
