Astanada alǵash ret «Nur Otan» partıasynyń qoldaýymen qazaq tilinde usynylyp otyrǵan brıtandyq agent Djeıms Bond jaıyndaǵy jıyrma tórtinshi «007: Spektr» fılminiń tanystyrylym-kórsetilimi ótti. Bul týraly «Qamshy» portaly partıanyń baspasóz qyzmetine silteme jasap habarlaıdy.

«007: Spektr» fılmi 2011 jyldan beri otandyq kınoteatrlarda memlekettik tilde shyǵatyn 12-shi kınokartına jáne 2015 jyldyń 3-shi kınopremerasy bolyp tabylady. «Bolashaq» qaýymdastyǵy bes jyldan bergi kezeńde álem deńgeıine tanylǵan kınotýyndylar men anımasıalyq fılmderdi qazaq tiline aýdarý bastamasyn tabysty iske asyryp keledi. Osy jyldar ishinde 11 gollıvýdtyq blokbaster memlekettik tilge aýdarylyp, dýblájdaldy.

Tuńǵysh ret qazaq tilinde dybystalǵan fılmderdiń qatarynda «Kólikter-2», «Batyl júrek», «Monstrlar ýnıversıteti», «Galaktıka saqshylary», «Kúlsheqyz», «Kek alýshylar: Áltron dáýiri» jáne t.b. syndy álemniń kınosúıer qaýymy joǵary baǵa bergen týyndylar bar.

Qazaq tiline dýblájdalǵan fılmniń tanystyrylymyna qatysqan «Nur Otan» partıasy Tóraǵasy birinshi orynbasarynyń keńesshisi Berik Qurmanǵalı osyndaı ıgi bastamaǵa «Nur Otan» partıasy byltyrǵy jyldan beri qoldaý bildirip, otandyq kınoteatrlarda qazaq tilinde kórsetiletin fılmder úlesin arttyrýǵa septigin tıgizip jatqandyǵyn jetkizdi. 

Osy jobanyń arqasynda qazaq tili áıgili Columbia Pictures kınokompanıasy ázirlegen fılmderdi dýblájdaýda 7-shi álemdik til bolyp bekitilse, ataqty Walt Disney stýdıasynda jasalǵan fılmderdi dýblájdaýda 7 myń álem tilderiniń ishinde 39-shy orynda tur.

Sondaı-aq B.Qurmanǵalı memlekettik tildiń bedelin arttyrýǵa baǵyttalǵan jobany qolǵa alyp, óz deńgeıinde iske asyrýǵa belsene kirisken barsha uıymdastyrýshylarǵa partıa atynan alǵys bildirdi.

«007: Spektr» fılminiń qazaq tilindegi nusqasynyń aldyn ala kórsetilimi Almaty qalasynda da ótti.