1 qarashadan bastap Almatydaǵy tramvaı deposynyń jumysy ýaqytsha toqtatylǵany týraly buryn da habarlaǵan bolatynbyz. Qala basshylyǵy bul tarıhı kólikti birjolata qoldanystan shyǵarý máselesi kún tártibine qoıylyp otyrǵan joq degenimen, depo jumysy qashan jandanatynyn naq basyp aıta almaı otyr. Sodan da bolar, turǵyndar arasynda tramvaı taǵdyryna qatysty túrli áńgimeler beleń ala bastady. Solardyń biri – Almaty ortalyǵyndaǵy tramvaı deposy ornalasqan jer qaltalylardyń kóz qurtyna aınaldy, depony jabý arqyly sol jerdi satýdy, satyp alýdy kókseıtinder bolýy múmkin degen áńgime.
Sonymen, Almatydaǵy ortalyq aýdan sanalatyn Baıtursynov-Gogol- Masanchı-Áıteke bı kósheleriniń kvadratyndaǵy kólemi shamamen 2,5 gektarǵa jýyqtaıtyn bul jer telimi satylymǵa shyǵarylǵan jaǵdaıda qanshaǵa baǵalanýy múmkin? «Absolút» jyljymaıtyn múlik agenttiginiń bas dırektory Sergeı Pogrebnák ulttyq valúta «erkin júzýge» jiberilmeı turyp bul aýdandaǵy 1 sotyq jer baǵasynyń quny 30-35 myń AQSH dollaryn quraǵany, qazirgi baǵammen 20-25 myń AQSH dollary kóleminde baǵalanatynyn aıtady. Iaǵnı, el aýzyndaǵy áńgime shyndyqqa aınalsa, depo aýmaǵy 5 mıllıon dollarǵa satylýy múmkin. Qala ishinde úı salatyn jer tapshylyǵyn eskersek, bul aımaq iri qurylys kompanıalary tarapynan suranysqa ıe emes dep aıta almaısyz.
«Tramvaı deposy birjola jabylyp jatqan joq, ondaǵy tehnıka men joldy qalpyna keltirý úshin jumysty ýaqytsha toqtata turý týraly sheshim qabyldandy» degen qalalyq jolaýshylar kóligi basqarmasynyń bastyǵy Erlan Ádilov bul «ýaqytsha toqtatýdyń» qanshaǵa sozylatynyn naqty aıta almady. Alaıda, búginde depo jumysshylaryn troleıbýs, avtobýs júrgizýshiligine qaıta oqytý, basqa jumystarǵa aýystyrý máseleleri qyzý qarastyrylýda. Soǵan qaraǵanda, 7 qarashada ashylǵanyna 78 jyl tolatyn depo jumysyn jandandyrý ákimdiktiń jaqyn ýaqyttaǵy josparynda joq sıaqty.
Darhan Muqan
